ცხელი ხაზი 272 22 22
14:26 06/05/2015
გამოიწერეთ სიახლეები ელ. ფოსტაზე
 

დღეს თბილისის მერიაში დედაქალაქის მთავრობის სხდომა გაიმართა. სხდომაზე თბილისის მერმა, დავით ნარმანიამ ყურადღება ორ საკითხზე - მერიის მომსახურე კომერციული ბანკის შესარჩევ კონკურსზე და პარკირების საკითხზე გაამახვილა.
თბილისის მერის განცხადებით, მერიას მომსახურებას „ლიბერთი ბანკი“ გაუწევს. დავით ნარმანიას განმარტებით, მერიის მომსახურე კომერციული ბანკის შესარჩევად კონკურსი წინა ხელშეკრულების ვადის ამოწურვის გამო გამოცხდდა.
დედაქალაქის მერის თქმით, კონკურსი  29 აპრილს გაიმართა, მასში მონაწილეობა  ექვსმა კომერციულმა ბანკმა მიიღო და მათ შორის საუკეთესო პირობების მქონე ბანკი შეირჩა.
„ეს არის „ლიბერთი ბანკი“, რომელმაც 9,3%-ი შემოგვთავაზა მის ანგარიშზე რიცხულ დეპოზიტებზე. შესაბამისმა კომისიამ მიიღო რეკომენდაცია, რომელიც დასამტკიცებლად მთავრობას წარედგინება“, - განაცხადა დავით ნარმანიამ. დღევანდელ სხდომაზე თბილისის მერი ასევე გამოეხმაურა პარკირების საკითხს. როგორც დავით ნარმანიამ აღნიშნა, მიღებულია გადაწყვეტილება, რომ თბილისში ვიწრო ტროტუარებზე პარკინგი შეიზღუდოს და პარკირების 50 ადგილი გათავისუფლდეს.
„ჩემი დავალებით ჯერ კიდევ, სამი თვის წინ დავიწყეთ ტროტუარებზე არსებული მდგომარეობის შესწავლა. იქ, სადაც ვიწრო ტროტუარია, ჩვენ ვზღუდავთ ავტომანქანების პარკირებას და დღესაც ვამტკიცებთ ერთ-ერთ ასეთ გადაწყვეტილებას, რომლის მიხედვითაც 50 პარკირების ადგილი მოიხსნება“, - განაცხადა დავით ნარმანიამ.
ამასთან, თბილისის მერის თქმით, დედაქალაქის მთავრობა აქტიურად მუშაობს მრავალსართულიანი პარკირების მოწყობასთან დაკავშირებით.

 

სიახლე
6 მაისი 2015  
 
 

თბილისის მერიასა და  გერმანიის რეკონსტრუქციისა და განვითარების ბანკს (KFW)  შორის „Morgenstadt City Lab Tbilisi“ პროექტის ფარგლებში ხელშეკრულება გაფორმდა. ხელშეკრულება KFW-ს მიერ 200 000 ევროს გამოყოფას ითვალისწინებს.
ხელშეკრულებას ხელი თბილისის მერმა დავით ნარმანიამ და გერმანიის რეკონსტრუქციისა და განვითარების ბანკის აღმოსავლეთ ევროპის, კავკასიისა და ცენტრალური აზიის ურბანული და რეგიონული განვითარების განყოფილების უფროსმა არნე გუსმა მოაწერეს.
როგორც დავით ნარმანიამ განაცხადა, შეთანხმება მომავალზე ორიენტირებული ქალაქის კონცეფციის მომზადებას ითვალისწინებს. თბილისის მერის თქმით, ხელშეკრულების ფარგლებში, გერმანული კვლევითი ორგანიზაციის  დახმარებით,  ქალაქის განვითარების სტრატეგიული დოკუმენტი მომზადდება.
„ეს არის „Smart City“-ის კონცეფცია, რომელიც ბევრ ქალაქში მუშაობს და თანამედროვე ტექნოლოგიებზეა დაფუძნებული. ეს მოიცავს ქალაქის კომუნალური ინფრასტრუქტურის მართვას, როგორიც არის გარე განათების ენერგოდამზოგავი სისტემა, ე.წ. ჭკვიანი შუქნიშნები, ელექტრონული პარკირების სისტემა და ბევრი ისეთი რამ, რაც ქალაქის ეფექტურ მართვას უკავშირდება. ამ თვალსაზრისით გერმანული კვლევითი ორგანიზაცია დაგვეხმარება და მათთან პარტნიორობით მოვამზადებთ ქალაქის განვითარების სტრატეგიულ დოკუმენტს, რომლის რეალიზაციასაც დავიწყებთ ეტაპობრივად. გერმანიის განვითარების ბანკმა ამისათვის 200 ათასი ევრო გამოგვიყო, ხოლო მუნიციპალიტეტის თანადაფინანსება 40 ათასი ევროა. ჯამში 240 ათასი ევროს კვლევითი პროექტი განხორციელდება“, - განაცხადა დავით ნარმანიამ.
ხელშეკრულება ადგილობრივი ეკონომიკური განვითარების მე-8 საერთაშორისო ფორუმის ფარგლებში გაფორმდა. ფორუმი სახელწოდებით “ინტეგრირებული და მოქალაქეებზე ორიენტირებული ურბანული განვითარება“   სასტუმრო „რადისონ ბლუ ივერიაში“ დღეს გაიხსნა. ფორუმის მიზანია იმ პრობლემების განხილვა, რომლებიც მწვავედ დგას სწრაფად მზარდი ქალაქების წინაშე.

 

 

სიახლე
5 მაისი 2015  
 
 

ქალაქის გამწვანების პროექტის ფარგლებში, ჩუღურეთის რაიონის გამგებელმა ზურაბ ჩიკვილაძემ და გამგეობის თანამშრომლებმა ხუდადოვის ქუჩაზე კიპარისის ნერგები დარგეს.
„თბილისის გამწვანების აქციაში აქტიურად ვართ ჩართულები. ხუდადოვის ქუჩის ამ მონაკვეთზე ჯერ კიდევ რამდენიმე თვის წინ ნაგავსაყრელი იყო. თებერვალში „თბილსერვის ჯგუფის“ დახმარებით ხევი დასუფთავდა და შემდეგ გადაწყდა კიდეც მისი გამწვანება,“ -განაცხადა ჩუღურეთის რაიონის გამგებელმა ზურაბ ჩიკვილაძემ.
გამწვანების აქციის ფარგლებში, ხუდადოვის ქუჩაზე 120 კიპაროსი დაირგო.

სიახლე
5 მაისი 2015  
 
 

თბილისის ათი რაიონის გამგებელი, გამგებლის მოადგილეები და ბინათმესაკუთრეთა ამხანაგობის განყოფილებების ხელმძღვანელები დღეს საბურთალოს რაიონის გამგეობის საკონფერენციო დარბაზში შეიკრიბნენ და ბინათმესაკუთრეთა ამხანაგობების განვითარების პროექტის კონკრეტულ დეტალებზე იმსჯელეს.
შეხვედრაზე, რომელსაც საბურთალოს რაიონის გამგებელი ბექა მიქაუტაძე უძღვებოდა, ყურადღება გამახვილდა ბმა-ს ფარგლებში შესრულებული სამუშაოების თაობაზე მუნიციპალური ლაბორატორიის საექსპერტო დასკვნის გაცნობის შემდგომი ღონისძიებების გატარების წესზე, რომელიც სასურველია ყველა გამგეობაში იდენტური იყოს. ამასთან, განიხილეს ბინათმესაკუთრეთა ამხანაგობების თავმჯდომარეებამდე კონკრეტული პროექტების შესახებ ინფორმაციის მიწოდების ეფექტური გზები.
შეხვედრაზე აღინიშნა, რომ საექსპერტო დასკვნებზე რეაგირებისას გათვალისწინებული უნდა იყოს რაიონის არქიტექტურული და ურბანული სპეციფიკა, რადგან დედაქალაქის რაიონების პრობლემები განსხვავებული ხასიათისაა და მათზე რეაგირებაც ინდივიდუალურ მიდგომას მოითხოვს.
ბმა-ს განვითარების თემაზე შეხვედრები საბურთალოს რაიონის გამგებლის ბექა მიქაუტაძის ინიციატივით ყოველკვირეულად იმართება.

სიახლე
5 მაისი 2015  
 
 

დიდუბის რაიონში, დიღმის მასივის მე-2 კვარტლის მე-3 კორპუსისა და ქურდიანის ქუჩა N 19-ის  ტერიტორიაზე შიდა კვარტალურ გზებზე ასფალტის საფარი იგება. სარეაბილიტაციო სამუშაოები დღეს  დიდუბის რაიონის გამგებელმა ირმა ზავრადაშვილმა,  გამგებლის მოადგილე ზურაბ უგულავასთან ერთად დაათვალიერა. 
სარეაბილიტაციო სამუშოების ფარგლებში სულ მიწის ზედაპირი 1700 კვ მეტრი ფართობის  გზის მონაკვეთზე მოიჭრა, მოეწყო ბორდიურები და  5 სანტიმეტრიანი ასფალტო-ბეტონის საფარი. პროექტის ღირებულება 54 900 ლარია.
დიდუბის რაიონის გამგეობის დაფინანსებით 4 მისამართზე უკვე დაიგო  600 კვ მეტრი მოცულობის ასფალტო ბეტონის საფარი, რისთვისაც რაიონის ბიუჯეტიდან  21 853 ლარი გამოიყო. გარდა ამისა, აქტიურად მიმდინარეობს დიღმის მასივის მე-2 კვარტლის მე-14 კორპუსთან ახალი სკვერის მოწყობის სამუშაოები.
შიდა კვარტალური გზების მოწყობის სამუშაოებს შ.პ.ს „საგზაო კომპანია“ ახორციელებს.
 
 

სიახლე
2 მაისი 2015  
 
 

20 მაისს, რუსთაველის თეატრის დიდ სცენაზე, გაიმართება უცხოეთში მოღვაწე ქართველი მომღერლის, დები იშხნელების შთამომავლის - მანანა მენაბდის კონცერტი-მარათონი. სპეციალურად კონცერტისთვის თბილისში ჩამოვიდა მოსკოვში მოღვაწე ქართველი პიანისტი - ნიკა ნიკვაშვილი. მომღერლის თხოვნით, გაყიდული ბილეთების სრული თანხა დიმიტრი ცინცაძის სახელობის ფონდში გადაირიცხება. პროექტის ორგანიზატორია არასამთავრობო ორგანიზაცია “ART&SOCIETY”. პროექტი ხორციელდება: თბილისის მერიის კულტურული ღონისძიებების ცენტრის, კულტურის სამინისტროს და თბილისი საკრებულოს მხარდაჭერით.
მანანა მენაბდე - ცნობილი ორკესტრის „რერო“ სოლისტი, მართავდა და ახლაც აგრძელებს კონცერტებს გერმანიის, საფრანგეთის, მოსკოვის, ინგლისის, უკრაინის, საუკეთესო სცენებზე. ჩაწერილი აქვს ათეულობით ალბომი, მუშაობდა, როგორც კომპოზიტორი რამდენიმე ფილმზე. ერთ-ერთმა ფილმმა „დღეს ღამე უთენებია“ ( რეჟისორი ლანა ღოღობერიძე) კანის ფესტივალზე მაყურებელთა სიმპათიის პრიზი დაიმსახურა. დაწერილი აქვს სიმღერები ცნობილი ქართველი პოეტების ტექსტებზე. უკვე 30 წელია, მანანა მენაბდე საქართველოს ფარგლებს გარეთ მოღვაწეობს. მომღერლის რეპერტუარი განახლდა, მოხდა ძველი სიმღერების ახლებური არანჟირება. კონცერტში მონაწილეობას იღებს კამერული ორკესტრი „კამერატა ჯორჯია“ და მოწვეული მუსიკოსები.
კონცერტის პარტნიორები არიან: თბილისის მერიის კულტურული ღონისძიებების ცენტრი, საქართველოს კულტურისა და ძეგლთა დაცვის სამინისტრო, თბილისის საკრებულო.
კონცერტის მხარდამჭერები: საზოგადოებრივი მაუწყებელი, რადიო „შოკოლადი“, კომპანია „DHL“.

სიახლე
5 მაისი 2015  
 
 

შეზღუდული შესაძლებლობების მქონე ბავშვები თბილისის გამწვანების აქციაში - „მე ვამწვანებ ქალაქს“ - ჩაერთნენ. თბილისის მერის მოადგილემ ირაკლი ლექვინაძემ, ჯანდაცვისა და სოციალური მომსახურების საქალაქო სამსახურის უფროსმა გელა ჩივიაშვილმა და ეკოლოგიისა და გამწვანების საქალაქო სამსახურის უფროსმა ბიძინა გიორგობიანმა დღეს შეზღუდული შესაძლებლობების მქონე ბავშვთა დღის ცენტრების აღსაზრდელებთან ერთად, დიდ დიღომში კიპარისის ნერგები დარგეს. აქციაში, ასევე, მონაწილეობდა საბურთალოს რაიონის გამგებელი ბექა მიქაუტაძე.
აღნიშნული აქციის მიზანი შშმ ბავშვების საზოგადოებაში მაქსიმალური ინტეგრაცია, მათი მოტივაციის გაზრდა და თანაბარი უფლებებისა და შესაძლებლობების დემონსტრაცია იყო. თბილისის მერიამ ამ კატეგორიის ბავშვებს ქალაქისთვის სასიკეთო საქმეში მონაწილეობის საშუალება მისცა და ე.წ. სიცოცხლის ხეების დარგვის აქციაში ჩართვით მათ ერთი პოზიტიური დღე აჩუქა.
„აისის“, „ანიკას“, „ბავშვი, ოჯახი, საზოგადოების“, „პირველი ნაბიჯისა“ და „მშობლების თანადგომას“ აღსაზრდელებმა დედაქალაქის ეკოლოგიური მდგომარეობის გაუმჯობესების მიზნით, თბილისის მოსახლეობას თუნდაც ერთი ხის დარგვისკენ მოუწოდეს და სურვილი გამოთქვეს, რომ მსგავს აქციაში მათი მონაწილეობა მაგალითი გახდეს შშმ პირებისთვის და საზოგადოება შეზღუდული შესაძლებლობების არარსებობაში დარწმუნდეს.
„თბილისის მერია განაგრძობს გამწვანების ღონისძიებებს თბილისის ყველა უბანში და მოხარული ვარ, რომ ამ ღონისძიებაში ჩართული არიან შეზღუდული შესაძლებლობების მქონე ბავშვები“, - აღნიშნა ირაკლი ლექვინაძემ.
გელა ჩივიაშვილის განცხადებით, ბავშვებს აუხსნეს, თუ რა მნიშვნელობა აქვს მათ დარგულ თითოეულ ნერგს თბილისისა და მათი ჯანმრთელობისთვის. მისი თქმით, მსგავსი მნიშვნელობის აქციები მომავალშიც გაგრძელდება.
„მერიასთან ერთად დავრგეთ ხეები, რაც ძალზე სასიხარულოა და ამაღლებულ განწყობას ქმნის თითოეულ ჩვენგანში. ძალიან პოზიტიური დღე იყო და რაც უფრო ბევრი იქნება ასეთი დღეები ჩვენი ბავშვებისთვის, უკეთესია, რადგან მათ ძალიან უყვართ ქველმოქმედება და სიკეთის კეთება“, - განაცხადა ასოციაცია „ანიკას“ წარმომადგენელმა ნიკოლოზ სეფერთელაძემ.

სიახლე
30 აპრილი 2015  
 
 

დიდუბის რაიონში ბინათმესაკუთრეთა ამხანაგობების მიერ ინიცირებული ინფრასტრუქტურული პროექტების განხორციელება გრძელდება. რაიონული გამგეობის დაფინანსებით, აგლაძის ქ 34-სა და 26 ნომრებში, დიღმის მასივის მე-2 კვარტლის მე-19 კორპუსსა და  მირცხულავას ქ N16-ში, 2 280 კვ.მ ფართობზე ბრტყელი სახურავი ჰიდროსაიზოლაციო მასალით  მოეწყო, რისთვისაც  დიდუბის რაიონის გამგეობამ 24 344 ლარი გამოყო.
სამუშაოებს დიდუბის რაიონის გამგეობა 2015 წლის ბიუჯეტიდან 80%-ით აფინანსებს, ხოლო ბინათმესაკუთრეთა ამხანაგობა, სამუშაოების 20%-ს იხდის.
სახურავების შეკეთების თხოვნით დიდუბის რაიონის გამგეობას ბინათმესაკუთრეთა ამხანაგობებმა მიმართეს.

 

სიახლე
5 მაისი 2015  
 
 

მთაწმინდის რაიონში, წავკისში, რუსთაველის ქუჩაზე 5700 კვადრატული მეტრის ფართობზე ასფალტის საფარი იგება. სამუშოებისთვის რაიონის ბიუჯეტიდან 140 000 ლარია გამოყოფილი. რუსთაველის ქუჩაზე მიმდინარე სამუშაოები დღეს მთაწმინდის რაიონის გამგებელმა გელა არჩვაძემ მოადგილესთან ერთად დაათვალიერა.  სარეაბილიტაციო სამუშაოები, რომელსაც შ.პ.ს. “ბლექ სი გრუპი”  აწარმოებს,  აპრილის ბოლომდე დასრულდება.
გარდა ამისა,  მთაწმინდის რაიონის გამგეობის ინფრასტრუქტურის განყოფილებამ,  გზის საფარი წავკისი-შინდისი-ტაბახმელას მუნიიპალიტეტში სამ ქუჩაზე 2 770 კვ მეტრის ფართობზე დააგო, რისთვისაც რაიონის ბიუჯეტიდან  54 000 ლარი გამოიყო. 

სიახლე
27 აპრილი 2015  
 
 

"ინტეგრირებული და მოქალაქეებზე ორიენტირებული ურბანული განვითარება" - ამ თემაზე დღეს სასტუმრო „რადისონ ბლუ ივერიაში“ ადგილობრივი ეკონომიკური განვითარების მე-8 საერთაშორისო ფორუმი გაიხსნა.  ფორუმის მიზანია იმ პრობლემების განხილვა, რომლებიც მწვავედ დგას სწრაფად მზარდი ქალაქების წინაშე.

ფორუმში ქართველი და უცხოელი ექსპერტები, ადგილობრივი და ცენტრალური ხელისუფლების, საერთაშორისო ორგანიზაციების, დიპლომატიური კორპუსის და სამოქალაქო საზოგადოების წარმომადგენლები მონაწილეობენ.

ფორუმის მონაწილეებს მისასალმებელი სიტყვით მიმართეს თბილისის მერმა დავით ნარმანიამ, საკრებულოს თავმჯდომარე გიორგი ალიბეგაშვილმა, ვიცე-პრემიერმა, ეკონომიკისა და მდგრადი განვითარების მინისტრმა გიორგი კვირიკაშვილმა, გერმანიის ელჩმა ორთვინ ჰენინგმა,  GIZ-ის დირექტორმა სამხრეთ კავკასიაში მარტინ ჰომოლამ და საფრანგეთის პრემიერ-მინისტრის მრჩეველმა პატრიკ ფოშერმა.

„მნიშვნელოვანია წლევანდელი ფორუმის თემატიკა, რომელიც  ურბანულ განვითარებას ეხება.  ჩვენ  ურბანულ განვითარებასთან დაკავშირებით რამდენიმე მნიშვნელოვანი ნაბიჯი გადავდგით, რაზეც დღეს ვისაუბრებთ და  უცხოურ გამოცდილებას მოვისმენთ. დაწყებულია აქტიური მუშაობა დედაქალაქის განაშენიანების გენერალურ გეგმაზე“ - განაცხადა დავით ნარმანიამ. მისი თქმით, ყველა წინაპირობა არსებობს იმისთვის, რომ თბილისი იქცეს რეგიონში პირველ «მომავლის ქალაქად», რომელშიც «სმარტ-სითის» კონცეფცია ორგანულად  იქნება შეთავსებული უნიკალური კულტურის შენარჩუნებისა და მრავალგანზომილებიანი ურბანული განვითარების ამოცანებთან.

როგორც დავით ნარმანიამ აღნიშნა, თბილისმა გერმანიაში   კონკურსში გაიმარჯვა,  რომლის საფუძველზეც მომზადდება ე.წ.  მომავლის ქალაქის, ანუ „სმარტ სითის“ სტრატეგია, რაშიც გერმანელი პარტნიორები დაგვეხმარებიან. „დღეს სიმბოლურად გერმანულ და ქართულ მხარეს შორის ხელი მოეწერება შეთანხმებას.  დედაქალაქის ბიუჯეტიდან გათვალისწინებულია თანადაფინანსებაც იმისთვის, რომ გერმანიის რეკონსტრუქციის ბანკის პროექტის ფარგლებში მოვამზადოთ ქალაქის მომავალი განვითარების სტრატეგია“ - განაცხადა დავით ნარმანიამ.   

ფორუმზე მიღებული რეკომენდაციები ხელს შეუწყობს ეფექტური მმართველობის გაძლიერებას და ურბანული განვითარების ისეთი მიზნობრივი პროექტების განსაზღვრას,  რომლებიც  სწრაფ ეკონომიკურ ზრდას გამოიწვევს,  ახალ სამუშაო ადგილებსა და შემოსავლის წყაროებს შექმნის.

ფორუმის დასასრულს თბილისის მერიასა და  გერმანიის რეკონსტრუქციის საკრედიტო ბანკს (KfW)  შორის „Morgenstadt City Lab Tbilisi“ პროექტის ფარგლებში ხელშეკრულება გაფორმდება.

ადგილობრივი ეკონომიკური განვითარების საერთაშორისო ფორუმი თბილისში 2007 წლიდან, ყოველწლიურად იმართება.

 

 

 

სიახლე
5 მაისი 2015  
 
 

თბილისის მერია სოციალური მომსახურების სააგენტოსა და საქართველოს დამსაქმებელთა ასოციაციასთან ერთად მეწარმეობის მსურველ ქალებს  სასწავლო პროგრამის "დაიწყე შენი ბიზნესი" ფარგლებში გადაამზადებს.
სასწავლო პროგრამა გათვალისწინებულია მათთვის, ვისაც უკვე აქვს  ბიზნეს იდეა და მის განხორციელებას უახლოეს მომავალში გეგმავს. ტრენინგკურსი მეწარმეობის მსურველებს საკუთარი ბიზნეს იდეის  მიხედვით ბიზნესგეგმის შედგენასა და ტექნიკურ-ეკონომიკური დასაბუთების მომზადებაში დაეხმარება.
ტრენინგი 28-30 აპრილს საქართველოს დამსაქმებელთა ასოციაციის ოფისში (ბელიაშვილის ქ.#8) ჩატარდება. მონაწილეები კურსის დასრულების შემდეგ  სერტიფიკატებს მიიღებენ. 

ტრენინგკურსი "დაიწყე შენი ბიზნესი"  შრომის საერთაშორისო ორგანიზაციის სასწავლო პროგრამის ფარგლებში ხორციელდება. პროგრამის მიზანია ხელი შეუწყოს მცირე  ბიზნესის  განვითარებას. აღნიშნული პროგრამა შემუშავებულია შვედეთის მეწარმეთა კონფედერაციის მიერ და ორიენტირებულია მცირე ბიზნესისა და ინდივიდუალური მეწარმეების მოთხოვნებზე.
ტრენინგში მონაწილეობის მსურველებმა უნდა შეავსონ  ანკეტა  და შემოიტანონ ქ.თბილისის მერიაში (შარტავას ქ.# 7).

იხილეთ ანკეტა 

სიახლე
22 აპრილი 2015  
 
 

პოლონეთში ოფიციალური ვიზიტით მყოფი თბილისის მერი დავით ნარმანია კრაკოვის მერს იაცეკ მაიხოვსკის შეხვდა. შეხვედრაზე მხარეებმა განიხილეს ორ ქალაქს შორის არსებული ურთიერთობები და სამამოვლო თანამშრომლობის გეგმები. აღინიშნა, რომ თბილისი და კრაკოვი 2009 წლიდან დაძბობილებული ქალაქებია და პარტნიორობის ხელშეკრულების ფარგლებში, არაერთი საინტერესო პროექტი განხორციელდა.
დავით ნარმანიას თქმით, აუცილებელია კრაკოვის თვითმმართველი ორგანოს საქმიანობის გაზიარება. „პოლონური თვითმმართველობა საფუძვლად დაედო საქართველოში ერთი წლის წინ შემუშავებულ ადგილობრივი თვითმმართველობის კოდექსს, ვინაიდან, პოლონეთის თვითმმართველობა თავისი არსით ძალიან ახლოსაა ქართულ თვითმმართველობასთან. ჩვენ ვეცდებით გავაღრმავოთ ურთიერთობები როგორც კრაკოვთან, ისე პოლონეთის სხვა ქალაქებთან და გავიზიაროთ მათი გამოცდილება“- განაცხადა დავით ნარმანიამ.
კრაკოვის მერის ინფორმაციით, მიმდინარე წლის ივნისში კრაკოვში დაგეგმილია ქართული კულტურის დღეები, რომელშიც მონაწილეობას მიიღებენ ქართული ფოლკლორული ანსამბლები, მხატვრები და ფოტოხელოვანები.
შეხვედრის ბოლოს ორი ქალაქის მერმა ხელი მოაწერა თბილისსა და კრაკოვს შორის პარტნიორობის განახლების შესახებ ხელშეკრულებას.
დავით ნარმანიამ კრაკოვის მერი თბილისში მოიწვია. 

სიახლე
4 მაისი 2015  
 
 

საბურთალოს რაიონის გამგეობაში საზოგადოებრივი საბჭოს მოქალაქე წევრთა შესარჩევი კომისიის სხდომა გაიმართა. 17 წევრისგან დაკომპლექტებულმა კომისიამ, რომელშიც არასამთავრობო, მედია და ბიზნეს ორგანიზაციების წარმომადგენლებთან ერთად, რაიონის ორი მაჟორიტარი დეპუტატი და გამგეობის თანამშრომლები შედიან, საზოგადოებრივი საბჭოების წევრობის კანდიდატებს მეორე ტურში გადასასვლელად კენჭი უყარა.

გადაწყვეტილების მიღებისას კომისიის წევრებმა იხელმძღვანელეს კანდიდატთა სამოტივაციო წერილებითა და უბნებიდან საბჭოს წევრთა წარმომადგენლობითობის პრინციპით.

კომისიის გადაწყვეტილებით, შერჩეულ წევრებთან გასაუბრება 2015 წლის 7 მაისს მოხდება.

საზოგადოებრივი საბჭოების პროექტი საბურთალოს რაიონის გამგებლის ბექა მიქაუტაძის მიერ არის ინიცირებული და ის თბილისის მერის დავით ნარმანიას გადაწყვეტილებით, პირველ ეტაპზე მხოლოდ საბურთალოზე განხორციელდება, მისი ეფექტურობის შემთხვევაში კი საზოგადოებრივი საბჭოები თბილისის ყველა რაიონის გამგეობაში დაინერგება.

საბჭოში სულ 21 წევრი შევა, რომელთაგან 10 იქნება შესაბამის ტერიტორიული მართვის ერთეულში რეგისტრირებული მოქალაქე, 2 ბიზნესის, 2 მედიის, 2 საზოგადოებრივი ორგანიზაციის წარმომადგენელი და უშუალოდ გამგეობის მიერ შერჩეული 5 პირი. საბოლოოდ, შეიქმნება სამი საზოგადოებრივი საბჭო საბურთალოს რაიონის სამ ტერიტორიულ ერთეულში:

• დიღომი, ვაშლიჯვარი

• ვეძისი, ყაზბეგი, გოთუა, საბურთალოს ქუჩა

• კოსტავა, ბახტრიონი, დოლიძე, ხილიანის ქუჩა

საზოგადოებრივი საბჭო იქნება მოქალაქეთა საკონსულტაციო ორგანო, რომელიც საშუალებას აძლევს რაიონის მცხოვრებ მოქალაქეებს ჩაერთონ მათი უბნის, ქუჩის, ქალაქის მართვაში, გამგებელთან და საკრებულოს წევრებთან ერთად მონაწილეობა მიიღონ რაიონისთვის მნიშვნელოვანი ადგილობრივი პრობლემების მოგვარებაში.

პროექტი საბურთალოს რაიონის გამგეობისა და არასამთავრობო ორგანიზაციების- ფონდი "ღია საზოგადოება საქართველო" და "სამოქალაქო საზოგადოების ინსტიტუტის" მიერ ერთობლივად ხორციელდება.

 

სიახლე
4 მაისი 2015  
 
 

მახათას მთაზე, მშენებარე ივერიის ღვთისმშობლის ხატის სახელობის ტაძრის მიმდებარე ტერიტორიაზე ზეთისხილის ბაღი გაშენდება.
ნერგების დარგვის მოსამზადებელი სამუშაოები უკვე დაწყებულია. სანერგე ორმოების ამოღების პროცესს თბილისის მერიის ეკოლოგიისა და გამწვანებისა საქალაქო სამსახურის უფროსი, ბიძინა გიორგობიანი გაეცნო.
ბიძინა გიორგობიანის განცხადებით, ივერიის ღვთისმშობლის ხატის სახელობის ტაძრის მიმდებარე ტერიტორიაზე 10 000 ძირი ზეთისხილი დაირგვება. ნერგების დარგვის ინიციატივა თბილისის მერიას, ფონდ „ივერიისას“ და საპატრიარქოს ეკუთვნის.
ზეთისხილის ნერგების დარგვის პროცესი ერთ კვირაში დაიწყება და მაისის ბოლოს დასრულდება.

 

 

 

 

 

 

სიახლე
17 აპრილი 2015  
 
 

თბილისის მერმა დავით ნარმანიამ კრაკოვში ადგილობრივი ხელისუფლებების ევროპულ კონგრესში მიიღო მონაწილეობა, რომელიც პოლონეთის პრეზიდენტის - ბრონისლავ კომოროვსკის პატრონაჟით ხორციელდება. კონგრესს ევროპის სხვადასხვა ქვეყნის ადგილობრივი თვითმმართველობებისა და ბიზნესის წარმომადგენლები ესწრებოდნენ. კონგრესის მიზანია, ევროპის თვითმმართველობებმა ერთმანეთს გაუზიარონ საკუთარი გამოცდილებები, ინოვაციები და სიახლეები, რაც ადგილობრივი თვითმმართველობის გაძლიერებას უწყობს ხელს.
განსაკუთრებული ყურადღება გამახვილდა ევროკავშირის როლზე თვითმმართველობათა განვითარების პროცესში და პერსპექტივებზე, რომელსაც ევროპის კავშირი ადგილობრივ თვითმმართველობებს ფინანსური და ინსტიტუციური განვითარების მხრივ ანიჭებს.
კონგრესზე თბილისის მერმა დავით ნარმანიამ ვრცლად ისაუბრა ასოცირების ხელშეკრულების შემდეგ თბილისისთვის გახსნილ შესაძლებლობებსა და იმ რეფორმებზე, რომელიც დედაქალაქის მომავალი განვითარებისთვის იგეგმება.
თბილისის მერმა განსაკუთრებული ყურადღება გაამახვილა თბილისის ენერგოეფექტურ და ეკოლოგიურ ქალაქად გარდაქმნაზე. მისი თქმით, ენერგოეფექტურობა და ეკოლოგია თბილისის მთავრობის ერთ-ერთი პრიორიტეტია. "მდგრადი საქალაქო ენერგეტიკის" თაობაზე ევროპულ ქალაქთა მერების კოვენანტის შესაბამისად, აქტიურად ვმუშაობთ, რათა შეთანხმების მონაწილე სხვა ქალაქების მსგავსად, 2020 წლისთვის 20%-ით შევამციროთ ქალაქში სათბური აირის გაფრქვევა. კოვენანტის ფარგლებში ამჟამად ხორციელდება ენერგოეფექტურობის სამოქმედო გეგმა. ვგეგმავთ ასევე ავტოტრანსპორტის პარკის განახლებას ეკოლოგიური მუნიციპალური ტრანსპორტით", - განაცხადა დავით ნარმანიამ.
თბილისის მერის თქმით, პირველი რიგის ამოცანებია კეთილმოწყობილი გზები, გამართული კომუნიკაციები, ხარისხიანი ურგენტული სამედიცინო დახმარება, მავნე გარემოს ზემოქმედების შემცირება, სისუფთავე და წესრიგი. მისივე თქმით, თბილისის მერიის შესაბამისი სამსახურები აქტიურად მუშაობენ ქალაქის განაშენიანების გენერალურ გეგმაზე.
თავის გამოსვლაში დავით ნარმანიამ განსაკუთრებული ყურადღება გაამახვილა პროექტზე "თბილისი - მომავლის ქალაქი". "თბილისი საერთაშორისო პროექტ "Morgenstadt City Challange"-ში ჩაერთვება. "მომავლის ქალაქი" - ასე ეწოდება პროექტს, რომელსაც გერმანულ მხარესთან ერთად განახორციელებს.  პროექტის ფარგლებში თბილისის ახალი ურბანული განვითარების პროექტზე მუშაობა ერთი წლის განმავლობაში გაგრძელდება, რის შემდეგაც თბილისი პირველი "მომავლის ქალაქი" იქნება რეგიონში", - განაცხადა თბილისის მერმა.
ადგილობრივი ხელისუფლებების ევროპულ კონგრესს ასევე ესწრებოდნენ თბილისის საკრებულოს წევრები - დავით უთმელიძე, სოსო მანჯავიძე და შალვა ოგბაიძე.

 

 

 

სიახლე
4 მაისი 2015  
 
 

თბილისს ახალი - ნიკო გომელაურის სახელობის სკვერი შეემატა. თავისუფალი თეატრის  მიმდებარე ტერიტორიაზე, მსახიობისა და პოეტის სახელობის ახალი სკვერის გახსნას თბილისის მერი  დავით ნარმანია, საკრებულოს თავმჯდომარე გიორგი ალიბეგაშვილი, საქართველოს კულტურისა და ძეგლთა დაცვის მინისტრის მოადგილე მანანა ბერიკაშვილი, ნიკო გომელაურის ოჯახის წევრები და ახლობლები, თბილისის მერიის წარმომადგენლები, თავისუფალი თეატრის მსახიობები და ნიკო გომელაურის შემოქმედების თაყვანისმცემლები ესწრებოდნენ.
ახალ სკვერში ნიკო გომელაურის ცხოვრებისა და მოღვაწეობის ამსახველი ფოტო-გამოფენაც გაიმართა. თბილისის მერმა მადლობა გადაუხადა ნიკო გომელაურის ოჯახს, მეგობრებს, კოლეგებს, რომლებიც თავიდანვე აქტიურად იყვნენ ჩართული ამ საქმეში.
„ნიკო გომელაური სრულიად ახალგაზრდა წავიდა ჩვენგან, მაშინ, როდესაც შემოქმედებითი სიმწიფის ასაკში შედიოდა. ასაკის მიუხედავად, მან ღრმა კვალი დატოვა ქართულ კულტურაში, ადამიანთა გულებში, დამსახურებულად მოიპოვა სიყვარული და პატივისცემა როგორც ხელოვანმა, მოქალაქემ და  მეგობარმა. ამდენად, ჩვენს მოვალეობად მიგვაჩნდა ნიკო გომელაურის სახელის უკვდავყოფა დედაქალაქში, იმ ადგილას, სადაც იგი მოღვაწეობდა - თავისუფალ თეატრთან, რომელიც, ალბათ, ყველაზე უკეთ და სრულად გამოხატავდა ამ ადამიანის სულისკვეთებას. თამამად შეიძლება ითქვას, რომ ნიკო გომელაურმა ჩვენს დედაქალაქს კიდევ ერთი შესანიშნავი სკვერი შესძინა, რომელიც თბილისელების საყვარელ  ადგილად იქცევა.“ - განაცხადა დავით ნარმანიამ.
დედაქალაქის მერიის ინიციატივით, ნიკო გომელაურის სკვერის კეთილმოწყობის სამუშაოები  თბილისის განვითარების ფონდმა  2014 წლის ზაფხულში დაიწყო და 2015 წლის აპრილის დასაწყისში დაასრულა. პროექტის ავტორია თბილისის მერიის არქიტექტურის სამსახურის უფროსი ნინო ღოღობერიძე.  მსახიობის მონუმენტი მოქანდაკე როკო ირემაშვილის ავტორობით დაიდგა.
სკვერის კეთილმოწყობის სამუშაოები ორ ეტაპად ჩატარდა. პირველ ეტაპზე, სკვერის ტერიტორია მოპირკეთდა მაღალი ხარისხის ბაზალტის ფილებით,  ირგვლივ ჩატარდა გამწვანებითი სამუშაოები, დაირგო დეკორატიული მცენარეები, კიბეებზე დამაგრდა რკინის მოაჯირები, დაიდგა სკამები, სკვერში ასევე დამონტაჟდა სანათები და  გაკეთდა თეატრის აფიშის დაფა. პროექტის მეორე ეტაპზე ნიკო გომელაურის ლექსები ლითონის ასოებით დაიწერა და  სკვერის საფეხმავლო მონაკვეთზე, სკამებსა  და კედელზე განთავსდა. 

სიახლე
15 აპრილი 2015  
 
იხილეთ მეტი