ცხელი ხაზი 272 22 22
21:33 19/04/2015
გამოიწერეთ სიახლეები ელ. ფოსტაზე
 

კრწანისის რაიონში, ახალი ხეივნის ქუჩაზე სანიაღვრე კოლექტორის მოწყობის სამუშაოები, ხოლო მიმდებარე ქუჩებზე საავტომობილო გზის რეაბილიტაცია აქტიურად მიმდინარეობს. აღნიშნული სამუშაოები დღეს თბილისის მერმა დავით ნარმანიამ კრწანისის გამგებელ გიორგი კოპალეიშვილთან და მაჟორიტარ დეპუტატ ბექა ნაცვლიშვილთან ერთად დაათვალიერა. თბილისის მერი ადგილობრივ მოსახლეობასაც შეხვდა და მათ უბანში არსებული სხვა პრობლემების შესახებ მიიღო ინფორმაცია.

„ამ უბანში მცხოვრებ მოსახლეობას წინასაარჩევნო პერიოდში დავპირდით, რომ მოვაწესრიგებდით ინფრასტრუქტურას. უკვე დავიწყეთ სანიაღვრე სისტემისა და საგზაო ინფრასტრუქტურის მოწესრიგება. გაცილებით უფრო მასშტაბურია საგზაო სამუშაოები, რომელსაც აქ ვახორციელებთ. რამდენიმე ქუჩაზე ერთობლივად იგება გზა. ფაქტობრივად, უმთავრესი პრობლემები, რაც ამ უბანს აწუხებდა, მოგვარდება. დღეს მოსახლეობამ სათამაშო მოედნის აღდგენაც გვთხოვა, რასაც აუცილებლად გავუკეთებთ. მაქსიმალურად მოვაწესრიგებთ ამ უბანს, რომ საცხოვრებლად უფრო კარგი გარემო შეიქმნას და ის დაპირებები, რაც ხალხს მივეცით, შევასრულოთ“, - განაცხადა დავით ნარმანიამ.

წლების განმავლობაში ადგილობრივებს წვიმის დროს სერიოზული პრობლემები ექმნებოდა, ვინაიდან, სანიაღვრე სისტემის გაუმართაობის გამო, გზა იტბორებოდა და წყალი მაცხოვრებელთა ეზოებში აღწევდა. ამ დროისთვის ქუჩაზე 350 მეტრი სიგრძის კოლექტორის სრული რეაბილიტაცია მიმდინარეობს. სანიაღვრე სისტემის გამართვაზე კრწანისის რაიონის გამგეობის ბიუჯეტიდან 87 000 ლარი დაიხარჯება.

აქტიურად მიმდინარეობს, აგრეთვე, ხეივნის II და III ქუჩების რეაბილიტაციაც, სადაც 4100 კვადრატული მეტრის საფარი ეწყობა. პროექტის ფარგლებში მოხდება გზის საფარის კაპიტალური შეკეთება. უკვე დასრულებულია გრუნტის მოწყობა. ამჟამად ქუჩაზე ასფალტის დაგების პროცესი მიმდინარეობს. აღნიშნული სამუშაოებისთვის კრწანისის რაიონის გამგეობის ბიუჯეტიდან 198 000 ლარია გამოყოფილი.

„ადგილობრივ მოსახლეობას, ძირითადად, უგზოობა და სანიაღვრე სისტემის გაუმართაობა აწუხებდა. საგზაო სამუშაოები ორ-სამ კვირაში დასრულდება, რაშიც გამგეობა 200 ათას ლარამდე დახარჯავს. მაქსიმუმ ერთ თვეში დასრულდება სანიაღვრის მოწყობა და ადგილობრივ მოსახლეობას ქუჩები და ეზოები აღარ დაეტბორება“, - განაცხადა კრწანისის გამგებელმა გიორგი კოპალეიშვილმა.

2015 წლის მეორე კვარტალში ასევე დასრულდება პირველი და დიდი ხეივნის ქუჩების მოასფალტებაც. პროექტის განხორციელების შედეგად დასახლებას მოწესრიგებული სანიაღვრე და საგზაო ინფრასტრუქტურა ექნება.

სიახლე
19 აპრილი 2015  
 
 

ვაკის პარკის ცენტრალური შესასვლელის რეაბილიტაცია აქტიურ ფაზაშია შესული. პროექტის ფარგლებში შეიცვალა დაზიანებული კიბეები, მოაჯირები და ტროტუარი. გამოიცვალა შესასვლელი რკინის კარი. რეაბილიტაციის შემდეგ ვაკის პარკის შესასვლელი სრულად ადაპტირებული იქნება. უკვე მოწყობილია პანდუსის სავალი ნაწილი და მიმდინარეობს მისი მოსაპირკეთებელი სამუშაოები. ასევე დამონტაჟდება ლიფტი შშმ პირებისათვის.

დღეს სარეაბილიტაციო სამუშაოები თბილისის მერმა დავით ნარმანიამ მერის მოადგილე ირაკლი ლექვინაძესთან, ვაკის რაიონის გამგებელ ლაშა აბაშიძესთან და კეთილმოწყობის საქალაქო სამსახურის უფროს ავთანდილ სუდაძესთან ერთად დაათვალიერა.
დავით ნარმანიას თქმით, ტერიტორია საკმაოდ დიდი ხნის განმავლობაში მოუწესრიგებელი იყო, ამიტომ მიმდინარე სარეაბილიტაციო სამუშაოები ძალიან მნიშვნელოვანია. „გარდა ამისა, ეტაპობრივად მოვაწესრიგებთ თვითონ პარკის ტერიტორიასაც. ეს აუცილებელია იმისათვის, რომ რეკრეაციული ტერიტორია შევინარჩუნოთ, კიდევ უფრო გავამწვანოთ და მოვუაროთ“, - განაცხადა თბილისის მერმა.

სარეაბილიტაციო სამუშაოები 2014 წლის დეკემბერში დაიწყო და 2015 წლის მაისში დასრულდება. პროექტისათვის დედაქალაქის ბიუჯეტიდან 600 000 ლარამდეა გამოყოფილი.

სიახლე
19 აპრილი 2015  
 
 

მახათას მთაზე, მშენებარე ივერიის ღვთისმშობლის ხატის სახელობის ტაძრის მიმდებარე ტერიტორიაზე ზეთისხილის ბაღი გაშენდება.
ნერგების დარგვის მოსამზადებელი სამუშაოები უკვე დაწყებულია. სანერგე ორმოების ამოღების პროცესს თბილისის მერიის ეკოლოგიისა და გამწვანებისა საქალაქო სამსახურის უფროსი, ბიძინა გიორგობიანი გაეცნო.
ბიძინა გიორგობიანის განცხადებით, ივერიის ღვთისმშობლის ხატის სახელობის ტაძრის მიმდებარე ტერიტორიაზე 10 000 ძირი ზეთისხილი დაირგვება. ნერგების დარგვის ინიციატივა თბილისის მერიას, ფონდ „ივერიისას“ და საპატრიარქოს ეკუთვნის.
ზეთისხილის ნერგების დარგვის პროცესი ერთ კვირაში დაიწყება და მაისის ბოლოს დასრულდება.

 

 

 

 

 

 

სიახლე
17 აპრილი 2015  
 
 

თბილისის მერი დავით ნარმანია „საბა გარდენში“ ნერგების ფესტივალს - Green Fest დაესწრო და იქ წარმოდგენილი მცენარეები დაათვალიერა. ფესტივალში მონაწილეობა იმ სანერგეებმა და კომპანიებმა მიიღეს, რომლებიც გამწვანების მიმართულებით მუშაობენ. თბილისის მერის განცხადებით,  ფესტივალი კარგად ორგანიზებულია და მოქალაქეებს ადგილზე ეძლევათ საშუალება, მათთვის სასურველი მცენაარეები შეიძინონ და მათი მოვლის ინსტუქციები ადგილზე მიიღონ.
„თბილისი ნამდვილად კარგი გარემოა და შესაბამისი კლიმატია იმისათვის, რომ ბევრი სხვადასხვა სახეობის მცენარე დაირგას. მოვუწოდებ თითოეულ ადამიანს, დაინტერედეს ამ გამოფენით და გაალამაზოს მისი მიმდენარე ტერიტორია. რაც შეეხება საჯარო სივრცეს, რა თქმა უნდა, ამაზე ქალაქის მერია იზრუნებს და ასე ერთობლივი ზრუნვით, საჯარო და კერძო სექტორის ერთობლივი მუშობით მივაღწევთ იმას, რომ ხვალ უკეთესი ქალაქი გვექნება“, - განაცხადა დავით ნარმანიამ.
თბილისის მერიის მხარდაჭერით ნერგების ფესტივალი პირველად გაიმართა. გამოფენაზე დამთვალიერებელს შესაძლებლობა ჰქონდა სარწყავი სისტემების, სასუქი საშუალებებისა და ხელსაწყო იარაღების ნიმუშებს გაცნობოდნენ.
ნერგების ფესტივალი Green Fest ორი დღის განმავლობაში გაგრძელდება.

 

 

სიახლე
18 აპრილი 2015  
 
 

თბილისს ახალი - ნიკო გომელაურის სახელობის სკვერი შეემატა. თავისუფალი თეატრის  მიმდებარე ტერიტორიაზე, მსახიობისა და პოეტის სახელობის ახალი სკვერის გახსნას თბილისის მერი  დავით ნარმანია, საკრებულოს თავმჯდომარე გიორგი ალიბეგაშვილი, საქართველოს კულტურისა და ძეგლთა დაცვის მინისტრის მოადგილე მანანა ბერიკაშვილი, ნიკო გომელაურის ოჯახის წევრები და ახლობლები, თბილისის მერიის წარმომადგენლები, თავისუფალი თეატრის მსახიობები და ნიკო გომელაურის შემოქმედების თაყვანისმცემლები ესწრებოდნენ.
ახალ სკვერში ნიკო გომელაურის ცხოვრებისა და მოღვაწეობის ამსახველი ფოტო-გამოფენაც გაიმართა. თბილისის მერმა მადლობა გადაუხადა ნიკო გომელაურის ოჯახს, მეგობრებს, კოლეგებს, რომლებიც თავიდანვე აქტიურად იყვნენ ჩართული ამ საქმეში.
„ნიკო გომელაური სრულიად ახალგაზრდა წავიდა ჩვენგან, მაშინ, როდესაც შემოქმედებითი სიმწიფის ასაკში შედიოდა. ასაკის მიუხედავად, მან ღრმა კვალი დატოვა ქართულ კულტურაში, ადამიანთა გულებში, დამსახურებულად მოიპოვა სიყვარული და პატივისცემა როგორც ხელოვანმა, მოქალაქემ და  მეგობარმა. ამდენად, ჩვენს მოვალეობად მიგვაჩნდა ნიკო გომელაურის სახელის უკვდავყოფა დედაქალაქში, იმ ადგილას, სადაც იგი მოღვაწეობდა - თავისუფალ თეატრთან, რომელიც, ალბათ, ყველაზე უკეთ და სრულად გამოხატავდა ამ ადამიანის სულისკვეთებას. თამამად შეიძლება ითქვას, რომ ნიკო გომელაურმა ჩვენს დედაქალაქს კიდევ ერთი შესანიშნავი სკვერი შესძინა, რომელიც თბილისელების საყვარელ  ადგილად იქცევა.“ - განაცხადა დავით ნარმანიამ.
დედაქალაქის მერიის ინიციატივით, ნიკო გომელაურის სკვერის კეთილმოწყობის სამუშაოები  თბილისის განვითარების ფონდმა  2014 წლის ზაფხულში დაიწყო და 2015 წლის აპრილის დასაწყისში დაასრულა. პროექტის ავტორია თბილისის მერიის არქიტექტურის სამსახურის უფროსი ნინო ღოღობერიძე.  მსახიობის მონუმენტი მოქანდაკე როკო ირემაშვილის ავტორობით დაიდგა.
სკვერის კეთილმოწყობის სამუშაოები ორ ეტაპად ჩატარდა. პირველ ეტაპზე, სკვერის ტერიტორია მოპირკეთდა მაღალი ხარისხის ბაზალტის ფილებით,  ირგვლივ ჩატარდა გამწვანებითი სამუშაოები, დაირგო დეკორატიული მცენარეები, კიბეებზე დამაგრდა რკინის მოაჯირები, დაიდგა სკამები, სკვერში ასევე დამონტაჟდა სანათები და  გაკეთდა თეატრის აფიშის დაფა. პროექტის მეორე ეტაპზე ნიკო გომელაურის ლექსები ლითონის ასოებით დაიწერა და  სკვერის საფეხმავლო მონაკვეთზე, სკამებსა  და კედელზე განთავსდა. 

სიახლე
15 აპრილი 2015  
 
 

თბილისის მერმა დავით ნარმანიამ ოლიმპიური ობიექტების დასუფთავების აქციაში მიიღო მონაწილეობა.
აქციის ფარგლებში სამშენებლო ნარჩენებისგან დასუფთავდა დიღომში არსებული ოლიმპიური კომპლექსის ტერიტორია. აქციაში ევროპის ახალგაზრდული ოლიმპიური ფესტივალი „თბილისი - 2015“-ის საორგანიზაციო კომიტეტის წარმომადგენლები, სხვადასხვა სასწავლებლის სტუდენტები და „თბილსერვის ჯგუფის“ თანამშრომლები მონაწილეობდნენ.
როგორც თბილისის მერმა აღნიშნა, ტერიტორია წლების განმავლობაში ნაგავსაყრელად იყო ქცეული. დავით ნარმანიას თქმით, ინფრასტრუქტურის მოწესრიგებისა და დასუფთავების  პროცესი ინტენსიურად მიმდინარეობს, ასევე, ეტაპობრივად სრულდება ოლიმპიური ობიექტების მშენებლობა.
დასუფთავების აქციაზე „თბილსერვის ჯგუფის“ მიერ მობილიზებული იყო სპეცტექნიკა. ადგილზე, ასევე, განთავსდა 50-მდე ნაგავშეკრები კონტეინერი.
თბილისის მერთან ერთად ადგილზე იმყოფებოდნენ: ტექნოლოგიური განვითარების ფონდის ხელმძღვანელი კახაბერ გვანცელაძე, ევროპის ახალგაზრდული ოლიმპიური ფესტივალის - „თბილისი - 2015“-ის საორგანიზაციო კომიტეტის თავმჯდომარის მოადგილე იოსებ დარჩია, „თბილსერვის ჯგუფის“ ტექნიკური დირექტორი დავით დოლიძე და თბილისის მერიის ეკოლოგიისა და გამწვანების საქალაქო სამსახურის უფროსი ბიძინა გიორგობიანი.

სიახლე
18 აპრილი 2015  
 
 

თბილისის გარე-განათების ქსელში კიდევ ერთი პილოტ პროექტი განხორციელდა. „სინათლის ქალაქის“ დახმარებით, ყაზახურმა კომპანია „SD Group”-მა ჯავახიშვილის ქუჩაზე, საცდელი ვადით, 17 LED სანათი დაამონტაჟა. დიოდური სანათების მონტაჟისა და განათების ჩართვის პროცესს „სინათლის ქალაქის“ ხელმძღვანელობა დაესწრო.
„სინათლის ქალაქის დირექტორის, ვასილ ხორავას განცხადებით, ამ ეტაპზე თბილისში 4 პილოტ პროექტი ხორციელდება. მისი თქმით, დიოდური სანათები დამონტაჟებულია ლეხ კაჩინსკის ქუჩაზე, ბარათაშვილის ხიდზე, აეროპორტის შესასვლელთან და ახლა უკვე ჯავახიშვილის ქუჩაზე. როგორც ხორავამ განაცხადა, მიმდინარე პილოტ პროექტებს სპეციალისტები აკვირდებიან, რომლებიც მათი ეფექტურობის შესახებ დასკვნას წარმოადგენენ.
საპილოტე პროექტები „სინათლის ქალაქმა“ პოლონურ კომპანიებთან „ბიო სულოშენ“ და „ევოლუცია პოლანდ“ ერთობლივად განახორციელა, მათ რიცხვს, ამჯერად, ყაზახური „SD Group”-მა დაემატა.
დიოდური სანათები  ელექტროენერგიის 60–70 %-იან ეკონომიას გასწევს.

სიახლე
8 აპრილი 2015  
 
 

თბილისის მერიასა და ტურიზმის ეროვნულ ადმინისტრაციას შორის ურთიერთთანამშრომლობის მემორანდუმი გაფორმდა. მემორანდუმს ხელი თბილისის მერმა დავით ნარმანიამ და საქართველოს ტურიზმის ეროვნული ადმინისტრაციის ხელმძღვანელმა გიორგი ჩოგოვაძემ მოაწერეს. 
დავით ნარმანიას განცხადებით, მემორანდუმის მიზანია ერთობლივი პროექტების განხორციელების გზით თბილისში ტურიზმის განვითარება და ქალაქის ტურისტული პოტენციალის წარმოჩენა როგორც ადგილობრივ, ისე საერთაშორისო დონეზე.
„ჩვენი უმთავრესი მიზანია თბილისი გახდეს ჩვენი რეგიონის ტურისტული ცენტრი, რისთვისაც ტურიზმის ადმინისტრაციასთან ერთად აქტიურად ვმუშაობთ. დედაქალაქის ფარგლებში ვაწესრიგებთ ტურისტულ ინფრასტრუქტურას, გვაქვს ტურიზმის ხელშემწყობი პროექტები და პროგრამები. ტურიზმის ეროვნულ ადმინისტრაციასთან ერთად ორგანიზება გავუწიეთ და დღესაც მიმდინარეობს ტურიზმის საერთაშორისო გამოფენა, რაც ძალიან საინტერესოა როგორც ტუროპერატორებისთვის, ისე ფიზიკური და იურიდიული პირებისთვის, რომლებიც ტურიზმთან დაკავშირებული რეწვით არიან დაკავებული. ჩვენ მათ მაქსიმალურად ვუწყობთ ხელს, რათა მეტი ტურისტი მოვიზიდოთ. მეტი ტურისტი ჩვენი ქალაქისთვის ნიშნავს თბილისის ცნობადობის ამაღლებას, მეტ შემოსავალს დედაქალაქისთვის და პირადპირ დაკავშირებულია ჩვენს ეკონომიკურ განვითარებასთან. ამიტომ ყველაფერს გავაკეთებთ იმისათვის, რომ ტურიზმი განვითარების ახალ საფეხურზე ავიდეს“, - განაცხადა თბილისის მერმა დავით ნარმანიამ.
მემორანდუმის მიხედვით, თბილისის მერია და ტურიზმის ეროვნული ადმინისტრაცია დედაქალაქში ტურიზმის განვითარებისა და პოპულარიზაციისათვის ერთობლივ ღონისძიებებს დაგეგმავენ და განახორციელებენ.
„დღეს მოეწერა ხელი მემორანდუმს, რომელიც თბილისის მერიასა და ტურიზმის ეროვნულ ადმინისტრაციას შორის ურთიერთთანამშრომლობას გულისხმობს. ჩვენ არ ველოდებოდით ამ მემორანდუმის ხელმოწერას, უკვე მიმდინარე და შერულებული პროექტებიც გვაქვს. რაც მთავარია გვაქვს სამომავლო პროექტები, რომელიც გულისხმობს თბილისის ტურისტული პოტენციალის მაქსიმალურად წარმოჩენას, იმ ინფრასტრუქტურის ხელშეწყობასა და განვითარებას, რომელიც ტურისტებისთვის საინტერესოა. დარწმუნებული ვარ, მერიასთან ძალიან წარმატებული თანამშრომლობა გვექნება“,- განაცხადა ტურიზმის ეროვნული ადმინისტრაციის ხელმძღვანელმა გიორგი ჩოგოვაძემ.

სიახლე
18 აპრილი 2015  
 
 

გლდანის რაიონის 59-ე საჯარო სკოლის ეზოში გამწვანების აქცია გაიმართა. საჯარო სკოლის მოსწავლეებთან და პედაგოგებთან ერთად, გამწვანების აქციაში მონაწილეობა მიიღეს თბილისის მერმა დავით ნარმანიამ, განათლების მინისტრმა თამარ სანიკიძემ, სამინისტროს თანამშრომლებმა, მანდატურებმა, ეკოლოგიისა და გამწვანების საქალაქო სამსახურის უფროსმა ბიძინა გიორგობიანმა.
თბილისის მერის განცხადებით, მნიშვნელოვანია, რომ გამწვანების პროცესში უშუალოდ სკოლის მოსწავლეები არიან ჩართული.

"თბილისის მერიასა და განათლების სამინისტროს შორის გაფორმებიული მემორანდუმის ფარგლებში ჩვენ იმ სკოლების ეზოებში, სადაც გვაქვს თავისუფალი სივრცე, ვრგავთ ხეებს. ეს ღონისძიება მნიშვნელოვანია ქალაქის გამწვანების თვალსაზრისით და ასევე მნიშვნელოვანია, რომ თვითონ მოსწავლეები არიან ჩართული ამ პროცესში და სწავლობენ, როგორ დარგონ ხეები და როგორ მოუარონ მას", - განაცხადა დავით ნარმანიამ.

როგორც განათლების მინისტრმა აღნიშნა, სკოლის მოსწავლეები თავად იზრუნებენ ნერგების მოვლა-პატრონობაზე, რაც მათი შემდგომი განვითარებისთვის მნიშვნელოვანია.

"სკოლები ძალიან აქტიურად ჩაებნენ გამწვანების პროგრამაში. დღეს ჩვენ ვართ 59-ე სკოლაში, რომელსაც საკმაოდ დიდი ტერიტორია აქვს და ერთ-ერთი მსხვილმასშტაბიანი პროექტი სწორედ აქ განხორციელდება, იმიტომ, რომ 1400 ნერგი უნდა დავრგოთ. ბავშვები ძალიან მონდომებულები არიან, ჩართულები არიან ასევე პედაგოგები, გვეხმარებიან მანდატურები. მნიშვნელოვანია, რომ ჩართულები არიან ბავშვები, რაც მათი განვითარებისთვის ძალია ნ კარგია", - განაცხადა თამარ სანიკიძემ.

სკოლის ტერიტორიაზე, პირველ ეტაპზე, 500 კვიპაროსის, 100 იფანისა და 100 ნეკერჩხლის ნერგი დაირგო. პროექტის მეორე ეტაპზე, სკოლის ეზოში დაახლოებით 800 ძირი ხე დაირგვება.

საჯარო სკოლების ეზოების გამწვანების პროექტის ფარგლებში, რომელიც თბილისში მდებარე 60 საჯარო სკოლას მოიცავს, ამ დროისთვის დარგულია 6 100 ფოთლოვანი და 1000 წიწვოვანი ჯიშის ნერგი. პროექტის მიხედვით, ჯამში, საჯარო სკოლების ეზოები 10 000 ფოთლოვანი და წიწვოვანი ჯიშის ხე-მცენარით განაშენიანდება.

როგორც საჯარო სკოლებში, ასევე სხვა ობიექტებზე, მერიის ეკოლოგიისა და გამწვანების საქალაქო სამსახურის მიერ დარგული მცენარეების მოვლა-პატრონობას ამავე სამსახურის კონტრაქტორი კომპანიები უზრუნველყოფენ. ისინი, ვალდებული არიან, ხმობის შემთხვევაში, ნარგავები შესაბამის სეზონზე ახალი ნერგებით ჩაანაცვლონ.

სიახლე
5 აპრილი 2015  
 
 

თბილისის მერია დედაქალაქის ბრენდული სუვენირის შესარჩევად კონკურსს აცხადებს.  სუვენირი უნდა შეესაბამებოდეს თბილისის ისტორიულ, კულტურულ, ტრადიციულ ღირებულებებსა და თავისებურებებს. კონკურსში მონაწილეობის მიღება შეუძლია ნებისმიერ ფიზიკურ და იურიდიულ პირს; კონკურსი ერთი თვე გაგრძელდება და  საუკეთესო ნამუშევარს  საკონკურსო კომისია შეარჩევს.
სუვენირი, რომელიც კომისიის წევრების უმაღლეს შეფასებას მიიღებს, დაჯილდოვდება 5 000 ლარით. შესაძლებელია გამოვლინდეს რამდენიმე ბრენდული სუვენირიც. ასეთ შემთხვევაში, საკონკურსო პრიზი გამარჯვებული სუვენირების ავტორებზე განაწილდება.
კონკურსში მონაწილეობის მსურველებს შეუძლიათ მიმართონ თბილისის მერიის ეკონომიკური პოლიტიკის საქალაქო სამსახურს.

სრული ინფორმაცია კონკურსის პირობების შესახებ

სიახლე
17 აპრილი 2015  
 
 

მელიქიშვილის გამზირი N49-დან წუხელ გამოსახლებული 2 ოჯახისთვის, რომელსაც მცირეწლოვანი ბავშვები ჰყავს, მთაწმინდის რაიონის გამგეობამ საცხოვრებელი ფართი უკვე გამონახა და ისინი ბინაში დღესვე შევლენ.
რაც შეეხება დანარჩენ 10 ოჯახს, როგორც მთაწმინდის, ისე თბილისის სხვა რაიონების გამგეობები მზად არიან, აღნიშნულ ოჯახები ბინის ქირით უზრუნველყონ. ამისათვის, გამოსახლებულებმა რეგისტრაციის ადგილის მიხედვით უნდა მონახონ 300 ლარამდე ღირებულების გასაქირავებელი ბინა, რომლის ქირასაც შესაბამისი გამგეობა გადაიხდის.
მელიქიშვილის გამზირი N49-დან წუხელ კერძო მესაკუთრის მოთხოვნით 12 ოჯახი იქნა გამოსახლებული. მესაკუთრემ შენობაში უკანონოდ შეჭრილები გასახლების თაობაზე წინასწარ გააფრთხილა, ხოლო მთაწმინდის რაიონის გამგეობამ, ამ ოჯახების პრობლემის მოგვარების მიზნით, მათ მუნიციპალურ თავშესაფარში გადასვლა შესთავაზა. მიუხედავად ამ შეთავაზებისა, გამოსახლებულმა ოჯახებმა  თავშესაფარში ცხოვრებაზე უარი თქვეს.

 

 

 

სიახლე
29 მარტი 2015  
 
 

საბურთალოს რაიონში, ნუცუბიძისა და ზაქარიაძის ქუჩებს შორის მდებარე კორპუსების შიდა კვარტალური გზების მოასფალტება გრძელდება. მიმდინარე სამუშაოები დღეს საბურთალოს რაიონის გამგებელმა დაათვალიერა. ბექა მიქაუტაძეს შემსრულებელი კომპანიისა და ექსპერტიზის ბიუროს წარმომადგენლები შეხვდნენ და მიმდინარე და უკვე დასრულებულ სამუშაოებზე ინფორმაცია მიაწოდეს.
ნუცუბიძისა და ზაქარიაძის ქუჩებს შორის არსებული დასახლების შიდა კვარტალური გზების მოწესრიგება თვეზე მეტია მიმდინარეობს.
ასფალტობეტონის საფარი უკვე მოეწყო ნუცუბიძის ქ. N 32, N34, N42-1-დან N48-მდე და ზაქარიაძის N8-ში; მოწესრიგდა სადარბაზოებთან მისასვლელი გზები, ბორდიურები და მიწისქვეშა კომუნიკაციები.
ამასთან, უკვე დაიგო ასფალტობეტონის საფარის პირველი ფენა ნუცუბიძისა და ზაქარიაძის დამაკავშირებელ ქუჩაზე.
ამ ტერიტორიაზე ასფალტი სულ 9,500 კვადრატულ მეტრ ტერიტორიაზე დაიგება. პროექტის ღირებულება 451,992 ლარია.

სიახლე
17 აპრილი 2015  
 
 

თბილისის მერიაში ახალი მთავრობის მოსვლის შემდეგ ავტოპარკი არ განახლებულა. მერიის ბალანსზე ამჟამად ირიცხება 267 ავტომანქანა, საიდანაც 239 ოპერატიულია და სხვადასხვა საქალაქო სამსახურებისა და გამგეობების თანამშრომლები, ობიექტებზე გასასვლელად, მონიტორინგისა და სხვა სამსახურეობრივი საჭიროებისთვის იყენებენ.
„ქამრების შემოჭერის“ პოლიტიკის ფარგლებში, თბილისის მერიამ ფინანსთა სამინისტროს უკვე გადაუგზავნა ხარჯების შემცირების შესახებ ინფორმაცია, რომლის თანახმად, თბილისის მუნიციპალიტეტის ადმინისტრაციული ხარჯების შემცირება 1 800 000 ლარამდე იგეგმება.
შემცირება ძირითადად ტრანსპორტისა და ტექნიკის ექსპლუატაციისა და მოვლა-შენახვის, ასევე საპრემიო ფონდის ხარჯზე იგეგმება. გარდა ამისა, ცალკეული პროგრამების/ქვეპროგრამების ფარგლებში იგეგმება საბიუჯეტო ცვლილებები, რომელთა შედეგად გამოთავისუფლებული რესურსები მიმართული იქნება ინფრასტრუქტურული პროექტების დასაფინანსებლად.

 

სიახლე
27 მარტი 2015  
 
 

ნაძალადევის რაიონში ბინათმესაკუთრეთა ამხანაგობების მიერ ინიცირებული ინფრასტრუქტურული პროექტების განხორციელება აქტიურად მიმდინარეობს. სართულშუა ნაპრალების სარეაბილიტაციო სამუშაოების შესახებ მარტში შემოსული განცხადებებიდან, ნაძალადევის რაიონის გამგეობა 9 პროექტს დააფინანსებს. ამ დროისთვის სარეაბილიტაციო სამუშაოები 6 ობიექტზე მიმდინარეობს. სამუშაოების ფარგლებში, კორპუსებზე გაჩენილი ნაპრალების ამოვსება ხდება, რაც კორპუსის მდგრადობას შეუწყობს ხელს. ნაძალადევის რაიონის გამგეობა ექვსივე მისამართზე მიმდინარე სარეაბილიტაციო სამუშაოებს 184 185 ლარით დააფინანსებს.

ნაძალადევის რაიონის გამგეობამ,  2015 წლის პირველ კვარტალში, სართულშუა ნაპრალების რეაბილიტაციის შესახებ სულ 14 განცხადება დააკმაყოფილა. პროექტების საერთო ღირებულება 473 978 ლარია. აქედან 5 მაღალსართულიან სახლში სართულშუა ნაპრალების რეაბილიტაცია დასრულდა. ამ 5 ობიექტზე შესრულებული სამუშაოები ნაძალადევის რაიონის გამგეობამ 154 625 ლარით დააფინანსა.

2015 წლის პირველი სამი თვის განმავლობაში, ნაძალადევის რაიონის გამგეობამ ბინათმესაკუთრეთა ამხანაგობების მიერ, სხვადასხვა ინფრასტრუქტურული სამუშაოს მოთხოვნით შემოტანილი განცხადებებიდან, სულ 116 განაცხადი დააკმაყოფილა. პროექტების საერთო ღირებულება 1 546 647 ლარია.

სიახლე
17 აპრილი 2015  
 
 

თბილისში, ზაარბრუკენის მოედანზე მარიოტის ქსელის  ბრენდის - მოქსის (MOXY) ახალი სასტუმრო აშენდება. პროექტის პრეზენტაციას დღეს, „თბილისი მარიოტში“ თბილისის ვიცე-მერი, დიმიტრი ქუმსიშვილი დაესწრო. როგორც პრეზენტაციაზე დიმიტრი ქუმსიშვილმა აღნიშნა, „მარიოტის“ ქსელის კიდევ ერთი სასტუმროს მშენებლობა მნიშვნელოვანია დედაქალაქის ტურისტული ინფრასტრუქტურის განვითარებისთვის. ვიცე-მერის თქმით, პროექტის განხორციელება დამატებითი სამუშაო ადგილების შექმნას შეუწყობს ხელს.
„თბილისში აშენდება კიდევ ერთი სასტუმრო, განხორციელდება ახალი ინვესტიცია. აღსანიშნავია, რომ მოქსი (MOXY) საშუალო და დაბალბიუჯეტიანი მომხმარებლისთვისაა განკუთვნილი. გარდა ამისა, აღნიშნული სასტუმრო შენდება ქალაქის ისტორიულ მოედანზე, გათვალისწინებულია სავაჭრო სივრცე და საოფისე ფართი, რაც ხელს შეუწყობს ქალაქის ამ ნაწილის შემდგომ განვითარებას“,  - განაცხადა დიმიტრი ქუმსიშვილმა.
მოქსი სპეციალურად შეიქმნა საშუალო და დაბალბიუჯეტიანი მომხმარებლის  დასაკმაყოფილებლად. პროექტით გათვალისწინებულია თანამედროვე სტანდარტებით აღჭურვილი 130 ნომრიანი სასტუმროს მშენებლობა.
პროექტის მთლიანი ღირებულება 25 მლნ აშშ დოლარს შეადგენს და მის განხორციელებაში მონაწილეობას იღებს აშშ-ს სამთავრობო სააგენტო „ოპიკი“ , რომელიც „ჯი-ემ-თი“ ჯგუფის სტრატეგიული პარტნიორია და მის მიერ განხორციელებულ ყველა პროექტში მონაწილეობს.
ახალი პროექტის დასრულება ჯი-ემ-თი ჯგუფს 2017 წელს აქვს დაგეგმილი.

 

 

სიახლე
17 აპრილი 2015  
 
იხილეთ მეტი