ცხელი ხაზი 272 22 22
22:13 28/04/2015
გამოიწერეთ სიახლეები ელ. ფოსტაზე
 

თბილისის მერიასა და ქართულ-ამერიკულ უნივერსიტეტს (GAU) შორის ურთიერთთანამშრომლობის მემორანდუმი გაფორმდა. მემორანდუმს ხელი თბილისის მერმა დავით ნარმანიამ და  GAU-ს პრეზიდენტმა, რ.მაიკლ ქაუგილიმ მოაწერეს.
მემორანდუმი ქართულ-ამერიკული უნივერსიტეტის ბაზაზე ადგილობრივი თვითმმართველობის მოხელეების მიერ სამეცნიერო-პრაქტიკული ნაშრომების შექმნას, GAU-ს სტუდენტებისთვის მერიაში პრაქტიკული სასწავლო კურსის გავლას და მუნიციპალურ კულტურულ-საგანმანათლებლო პროგრამებში ჩართვას ითვალისწინებს.
დღესვე თბილისის მერმა ქართულ-ამერიკულ უნივერსიტეტში საჯარო ლექცია წაიკითხა და სტუდენტებს დედაქალაქში მიმდინარე და დაგეგმილ პროექტებზე ინფორმაცია მიაწოდა.
დავით ნარმანიას თქმით, ქართულ-ამერიკული უნივერსიტეტის სტუდენტები თბილისის მერიაში სტაჟირებას გაივლიან. თავის მხრივ, უნივერსიტეტი მერიას სხვადასხვა კვლევების განხორციელებაში დაეხმარება. რაც შეეხება ლექციას, თბილისის მერის თქმით, სტუდენტების მხრიდან საინტერესო შეკითხვები დაისვა  და იმედია, პასუხებიც ამომწურავი იყო. „დღეს ვისაუბრეთ იმ მდგომარეობაზე, რაც თბილისის მერიაში დაგვხვდა, ასევე იმ პროექტებზე, პროგრამებზე და რეფორმებზე, რასაც ვახორციელებთ“, - განაცხადა დავით ნარმანიამ.

 

 

 

 

სიახლე
28 აპრილი 2015  
 
 

თამარაშვილის N13-ის მიმდებარე ტერიტორიაზე ერთი და იგივე დროს თბილისის არქიტექტურის სამსახურში შევიდა ქალაქგეგმარებითად არასწორად გამიჯნული რამდენიმე მიწის ნაკვეთის მესაკუთრის მოთხოვნა აღნიშნული ნაკვეთების ცალ-ცალკე სამშენებლო განვითარებაზე. იმის გამო, რომ არ მიგვეღო მოუწესრიგებელი სივრცით-გეგმარებითი განაშენიანება და არ მომხდარიყო ტერიტორიის ქაოსური განვითარება, თბილისის არქიტექტურის სამსახურმა მიიღო გადაწყვეტილება, მთელი ტერიტორიის სამშენებლო განვითარება განხორციელებულიყო განაშენიანების რეგულირების გეგმის  ფარგლებში. შეჩერდა ცალკეულ ნაკვეთებზე მშენებლობის ნებართვების გაცემა და დაიგეგმა ყველა მესაკუთრესთან შეხვედრა გრგ-ს დამუშავებაზე რეკომენდაციების გასაწევად.
მესაკუთრეებმა ზონალურ საბჭოს არაერთხელ წარუდგინეს განაშენიანების რეგულირების გეგმა, თუმცა, ყოველ ჯერზე მათ გარკვეული ხარვეზები უდგინდებოდა. ამასთან, წარმოებაში  ჩართული იყო მომჩივანი მხარეც - მიმდებარე კორპუსის მაცხოვრებლები, რომლებიც ახალი მშენებლობის რამდენიმე მეტრით გადაწევას ითხოვდნენ. საბოლოოდ წარმოდგენილ ვერსიაში გათვალისწინებული იქნა კომისიის რეკომენდაციები – ჩამოყალიბდა 2 შიდა ეზო პერიმეტრული განაშენიანებით, რომელთაც სივრცულად ერთმანეთთან ექნება კონტაქტი, რაც იმას ნიშნავს, რომ სარეკრეაციო სივრცეები შიდა ეზოების ხარჯზე გაზრდილია და ზონისთვის დადგენილი მოშენების ფართი, გამწვანების მაქსიმალური შენარჩუნებით, 0,7-დან შემცირებულია 0.4-მდე. არქიტექტურის სამსახურმა გაითვალისწინა ადგილობრივთა პრეტენზიებიც და საპროექტო შენობა მათ სახლს 25 მეტრით მოშორდა. გრგ-ს ამ ვერსიის განხორციელებას მერიის ეკოლოგიისა და გამწვანების სამსახურიდან ესაჭიროებოდა ხეების მოჭრასა და გადარგვაზე ნებართვები, რაც დამკვეთებმა წარმოადგინეს.
27 აპრილს „არქი ჯგუფის“ სამშენებლო კომპანია „გრინ-სითიმ“ თამარაშვილის N13-ში ნარგავების მოჭრის სამუშაოები ნაჩქარევად და გარკვეული პირობების დარღვევით დაიწყო, რასაც ეკოლოგიისა და გამწვანების სამსახურის მხრიდან სწრაფი რეაგირება და ჭრის პროცესის დაუყოვნებლივ შეჩერება მოჰყვა. კომპანიამ, მშენებლობის განხორციელების მიზნით, თავის კუთვნილ ტერიტორიაზე ნარგავების მოჭრაზე წერილობითი თანხმობა მიმდინარე წლის 24 აპრილს მიიღო. ეკოლოგიისა და გამწვანების საქალაქო სამსახურის მიერ გაცემული ნებართვა ეხება 30, მათ შორის, 4 გამხმარი ხის მოჭრასა და 19 ხე-მცენარის გადარგვას. ქ. თბილისის მუნიციპალიტეტის ტერიტორიაზე მწვანე ნარგავების დაცვის, მოვლისა და აღდგენის დამტკიცების შესახებ საკრებულოს N17-55 დადგენილებით (თავი 3, მუხლი 26), კერძო მესაკუთრეს უფლება აქვს, მშენებლობის მიზნით მოითხოვოს ხეების მოჭრა სათანადო კომპენსაციის გათვალისწინებით. კანონის შესაბამისად, კომპანიამ სრულად გადაიხადა ნარგავების აღდგენითი ღირებულების თანხა - 88 884 ლარი. თავდაპირველად, აღნიშნულ ტერიტორიაზე კომპანიამ მოითხოვა გაცილებით მეტი ნარგავის მოჭრა, თუმცა, სამსახურის მხრიდან მრავალჯერადი შენიშვნის გათვალისწინებითა და წარმოდგენილი პროექტის კორექტირების შედეგად, მოსაჭრელი ხეების რაოდენობა შეძლებისდაგვარად მინიმუმამდე დავიდა. გაცემული ნებართვის მიუხედავად, თბილისის არქიტექტურის სამსახურის დავალების გათვალისწინებით, სამშენებლო კომპანია ვალდებული იყო, დალოდებოდა ჯერ საკრებულოს მიერ აღნიშნული ტერიტორიის კორექტირებული განაშენიანების რეგულირების გეგმის დამტკიცებას და მხოლოდ ამის შემდეგ დაეწყო ნებართვით გათვალისწინებული მოჭრისა თუ გადარგვის სამუშაოები. კომპანიამ ხე-მცენარეების ჭრა კორექტირებული გრგ-ს დამტკიცების გარეშე დაიწყო. ეკოლოგიისა და გამწვანების სამსახურმა აღნიშნულთან დაკავშირებით დაუყოვნებლივ, წერილობით მიმართა კომპანიას სამუშაოების შეჩერების მოთხოვნით, რაც კომპანიის მხრიდან ასევე მყისიერად შესრულდა. სამუშაოების შეჩერებამდე ტერიტორიაზე 17 ხე მოიჭრა. საკითხი მოსაკვლევად და შემდგომი რეაგირებისთვის თბილისის მერიის ზედამხედველობისა და შიდა აუდიტის სამსახურებს გადაეცა.
აღსანიშნავია, რომ კომპანიას, ეკოლოგიისა და გამწვანების სამსახურის მიერ დაკისრებული ვალდებულების შესაბამისად, მოსაჭრელი ნარგავების საკომპენსაციოდ უკვე დარგული აქვს 300 ხე-მცენარე მიმდებარე ტერიტორიაზე, ხოლო ახლო მომავალში დამატებით 1000 ხე-მცენარეს დარგავს.

 

 

 

 

სიახლე
28 აპრილი 2015  
 
 

მთაწმინდის რაიონში, წავკისში, რუსთაველის ქუჩაზე 5700 კვადრატული მეტრის ფართობზე ასფალტის საფარი იგება. სამუშოებისთვის რაიონის ბიუჯეტიდან 140 000 ლარია გამოყოფილი. რუსთაველის ქუჩაზე მიმდინარე სამუშაოები დღეს მთაწმინდის რაიონის გამგებელმა გელა არჩვაძემ მოადგილესთან ერთად დაათვალიერა.  სარეაბილიტაციო სამუშაოები, რომელსაც შ.პ.ს. “ბლექ სი გრუპი”  აწარმოებს,  აპრილის ბოლომდე დასრულდება.
გარდა ამისა,  მთაწმინდის რაიონის გამგეობის ინფრასტრუქტურის განყოფილებამ,  გზის საფარი წავკისი-შინდისი-ტაბახმელას მუნიიპალიტეტში სამ ქუჩაზე 2 770 კვ მეტრის ფართობზე დააგო, რისთვისაც რაიონის ბიუჯეტიდან  54 000 ლარი გამოიყო. 

სიახლე
27 აპრილი 2015  
 
 

თბილისის მერის მოადგილე გიორგი სოლომონია და შპს „სინათლის ქალაქის“ დირექტორი ვასილ ხორავა დიოდური განათების მწარმოებელ ლატვური კომპანია „Vizalo LED Lighting“-ის წარმომადგენლებს შეხვდნენ. შეხვედრაზე მერიის მიერ გამოცხადებულ ინტერესთა გამოხატვის დოკუმენტის შესახებ იმსჯელეს, რომელიც დედაქალაქის ენერგოდამზოგავ გარე განათებაზე გადასვლას ითვალისწინებს.
კომპანიის წარმომადგენლებმა თბილისის მერის მოადგილეს მათ მიერ წარმოებული პროდუქცია გააცნეს და მერიის მიერ გამოცხადებულ ინტერესთა გამოხატვასთან დაკავშირებით ტექნიკური საკითხებით დაინტერესდნენ.
თბილისის მერის მოადგილის გიორგი სოლომონიას თქმით, დიოდური განათების დამონტაჟება მნიშვნელოვანია, რადგან ეკონომიურია და ბიუჯეტი ამით თანხას დაზოგავს.
„სინათლის ქალაქის“ დირექტორის ვასილ ხორავას თქმით, 15 მაისს მერიაში გამოცხადებული ინტერესთა გამოხატვის დოკუმენტის ვადა იწურება. ამასთან დაკავშირებით, „სინათლის ქალაქი“ ყველა იმ კომპანიასთან მართავს შეხვედრებს, ვისაც ინტერესთა გამოხატვის წარდგენამდე  გარკვეული კითხვები აქვს. თბილისის მერიამ სოდიუმის სანათების თანამედროვე ტექნოლოგიების ახალი სანათებით ჩანაცვლებასთან დაკავშირებით, წინადადებების მიღება 1 აპრილიდან დაიწყო.  გამარჯვებული კომპანიის შერჩევის შემდეგ, თბილისში გარე-განათების სისტემის მოდერნიზაცია დაიწყება, რაც არსებული სანათების დიოდური სანათებით ჩანაცვლებას ითვალისწინებს. თანამედროვე ტექნოლოგიებზე გადასვლით, თბილისში ელექტროენერგიის 60–70 პროცენტიანი ეკონომია მოხდება.

 

სიახლე
28 აპრილი 2015  
 
 

თბილისის მერია სოციალური მომსახურების სააგენტოსა და საქართველოს დამსაქმებელთა ასოციაციასთან ერთად მეწარმეობის მსურველ ქალებს  სასწავლო პროგრამის "დაიწყე შენი ბიზნესი" ფარგლებში გადაამზადებს.
სასწავლო პროგრამა გათვალისწინებულია მათთვის, ვისაც უკვე აქვს  ბიზნეს იდეა და მის განხორციელებას უახლოეს მომავალში გეგმავს. ტრენინგკურსი მეწარმეობის მსურველებს საკუთარი ბიზნეს იდეის  მიხედვით ბიზნესგეგმის შედგენასა და ტექნიკურ-ეკონომიკური დასაბუთების მომზადებაში დაეხმარება.
ტრენინგი 28-30 აპრილს საქართველოს დამსაქმებელთა ასოციაციის ოფისში (ბელიაშვილის ქ.#8) ჩატარდება. მონაწილეები კურსის დასრულების შემდეგ  სერტიფიკატებს მიიღებენ. 

ტრენინგკურსი "დაიწყე შენი ბიზნესი"  შრომის საერთაშორისო ორგანიზაციის სასწავლო პროგრამის ფარგლებში ხორციელდება. პროგრამის მიზანია ხელი შეუწყოს მცირე  ბიზნესის  განვითარებას. აღნიშნული პროგრამა შემუშავებულია შვედეთის მეწარმეთა კონფედერაციის მიერ და ორიენტირებულია მცირე ბიზნესისა და ინდივიდუალური მეწარმეების მოთხოვნებზე.
ტრენინგში მონაწილეობის მსურველებმა უნდა შეავსონ  ანკეტა  და შემოიტანონ ქ.თბილისის მერიაში (შარტავას ქ.# 7).

იხილეთ ანკეტა 

სიახლე
22 აპრილი 2015  
 
 

საბურთალოს რაიონში მიმდინარე ექსკლუზიური პროექტის - საზოგადოებრივი საბჭოების შექმნის დეტალები დღეს საბურთალოს რაიონის გამგებელმა ბექა მიქაუტაძემ  არასამთავრობო და მედია ორგანიზაციების წარმომადგენლებს გააცნო. არასამთავრობო ორგანიზაციების წარმომადგენლებმა გამგებელს წარუდგინეს საკონკურსო კომისიის შექმნის პრინციპები და ის კრიტერიუმები, რომლის მიხედვითაც საზოგადოებრივი საბჭოების წევრობის კანდიდატთა შერჩევა მოხდება.
საზოგადოებრივი საბჭოების წევრობის სურვილი ღია კონკურსის გზით უკვე გამოთქვა საბურთალოს რაიონში რეგისტრირებულმა 84-მა მოქალაქემ. კონკურსის მეორე ეტაპი იქნება გასაუბრება, რომელსაც არასამთავრობო, მედია და ბიზნეს-ორგანიზაციების, ასევე გამგეობის წარმომადგენლებისაგან შემდგარი კომისია ჩაატარებს.
საბურთალოზე სულ სამი საზოგადოებრივი საბჭო იქნება და ერთ-ერთი მათგანის პირველი შეხვედრა მაისის შუა რიცხვებში გაიმართება.
საბურთალოს რაიონის გამგეობაში გამართულ შეხვედრას ორგანიზაციების - „CSI“, „CIVITAS GEORGICA“ ენერგეტიკისა და კომუნიკაციების განვითარების ჯგუფისა და საზოგადოებრივი მაუწყებლის წარმომადგენლები ესწრებოდნენ.

 

სიახლე
28 აპრილი 2015  
 
 

მახათას მთაზე, მშენებარე ივერიის ღვთისმშობლის ხატის სახელობის ტაძრის მიმდებარე ტერიტორიაზე ზეთისხილის ბაღი გაშენდება.
ნერგების დარგვის მოსამზადებელი სამუშაოები უკვე დაწყებულია. სანერგე ორმოების ამოღების პროცესს თბილისის მერიის ეკოლოგიისა და გამწვანებისა საქალაქო სამსახურის უფროსი, ბიძინა გიორგობიანი გაეცნო.
ბიძინა გიორგობიანის განცხადებით, ივერიის ღვთისმშობლის ხატის სახელობის ტაძრის მიმდებარე ტერიტორიაზე 10 000 ძირი ზეთისხილი დაირგვება. ნერგების დარგვის ინიციატივა თბილისის მერიას, ფონდ „ივერიისას“ და საპატრიარქოს ეკუთვნის.
ზეთისხილის ნერგების დარგვის პროცესი ერთ კვირაში დაიწყება და მაისის ბოლოს დასრულდება.

 

 

 

 

 

 

სიახლე
17 აპრილი 2015  
 
 

თბილისის მერია „სითი პარკთან“ გაფორმებულ ხელშეკრულებაში ცვლილებების შეტანის მიზნით კომპანიის წარმომადგენლებთან მოლაპარაკებებს იწყებს. მოლაპარაკებებზე მერია ხელშეკრულებაში 4 ძირითადი ცვლილების შეტანის საკითხს დააყენებს: 1.შეეზღუდოს „სითი პარკს“ ავტომანქანების საჯარიმო სადგომზე გადაყვანის უფლება, ვინაიდან ხშირ შემთხვევაში არასწორად გაჩერებული მანქანა მოძრაობას ხელს არ უშლის. კომპანიას ავტომანქანის საჯარიმო სადგომზე გადაყვანის უფლება მხოლოდ იმ შემთხვევაში მიეცემა, თუ იგი მოძრაობას შეაფერხებს; 2.შეიცვალოს შემოსავლების უთანასწორო განაწილების წესი, რომელიც წლების განმავლობაში დედაქალაქს შემოსავალს აკარგვინებდა. აღნიშნული ცვლილება თბილისის ბიუჯეტს დამატებით თანხებს გაუჩენს, რითაც სხვადასხვა პროექტი განხორციელდება; 3.შეიზღუდოს ტროტუარებზე პარკირება, რაც ქვეითად მოსიარულეებს თავისუფლად გადაადგილების შესაძლებლობას მისცემს. პარალელურად, თბილისის მერია აპირებს, უახლოეს მომავალში გამოაცხადოს ინტერესთა გამოხატვა ინვესტორთათვის დედაქალაქში პარკინგების მშენებლობასთან დაკავშირებით; 4.გაუქმდეს ხელშეკრულების ის მუხლი, რომლითაც წლების განმავლობაში „სითი პარკს“ პარკირების მოწყობისა და ადმინისტრირების ექსკლუზიური უფლება ჰქონდა. აღნიშნული ცვლილება ბაზარზე სხვა კომპანიების გაჩენის შესაძლებლობას შექმნის, კონკურენტული გარემო კი აღნიშნულ სფეროში სერვისს გააუმჯობესებს.
რაც შეეხება კომპანიასთან გაფორმებული ხელშეკრულების გაწყვეტას, ამ შემთხვევაში, დედაქალაქის მერიას კოლოსალური ჯარიმის გადახდა მოუწევს, რაც ხელშეკრულების შესწავლის შემდეგ საერთაშორისო აუდიტორულმა კომპანიამ - „Ernst & Young“-მაც დაადასტურა. ხელშეკრულების ცალმხრივად გაწყვეტის შემთხვევაში, თბილისის მერიას „სითი პარკისთვის“ არანაკლებ 25 მილიონი ლარის გადახდა დაეკისრება, რაც დედაქალაქის ბიუჯეტს მძიმე ტვირთად დააწვება და სხვა მნიშვნელოვანი პროექტების განხორციელებას კითხვის ნიშნის ქვეშ დააყენებს.
იმის გამო, რომ, ერთი მხრივ, მოხდეს მოქალაქეთა კანონიერი ინტერესების გათვალისწინება, მეორე მხრივ კი, არ იზარალოს ქალაქმა, თბილისის მერია უახლოეს დღეებში კომპანიასთან მოლაპარაკებებს დაიწყებს, ხოლო მიღწეულ შეთანხმებებს გაასაჯაროებს. ვინაიდან საკითხი დელიკატურია, თბილისის მერია მოუწოდებს პოლიტიკოსებს, შეწყვიტონ პოლიტიკური სპეკულაციები აღნიშნულ საკითხთან დაკავშირებით და არ შეიყვანონ მოსახლეობა შეცდომაში. დედაქალაქის მერია თავისი შესაძლებლობების მაქსიმუმს გააკეთებს იმისათვის, რომ თბილისელთა ინტერესი სახეცვლილ ხელშეკრულებაში მაქსიმალურად იყოს გათვალისწინებული.

 

 

სიახლე
28 აპრილი 2015  
 
 

თბილისს ახალი - ნიკო გომელაურის სახელობის სკვერი შეემატა. თავისუფალი თეატრის  მიმდებარე ტერიტორიაზე, მსახიობისა და პოეტის სახელობის ახალი სკვერის გახსნას თბილისის მერი  დავით ნარმანია, საკრებულოს თავმჯდომარე გიორგი ალიბეგაშვილი, საქართველოს კულტურისა და ძეგლთა დაცვის მინისტრის მოადგილე მანანა ბერიკაშვილი, ნიკო გომელაურის ოჯახის წევრები და ახლობლები, თბილისის მერიის წარმომადგენლები, თავისუფალი თეატრის მსახიობები და ნიკო გომელაურის შემოქმედების თაყვანისმცემლები ესწრებოდნენ.
ახალ სკვერში ნიკო გომელაურის ცხოვრებისა და მოღვაწეობის ამსახველი ფოტო-გამოფენაც გაიმართა. თბილისის მერმა მადლობა გადაუხადა ნიკო გომელაურის ოჯახს, მეგობრებს, კოლეგებს, რომლებიც თავიდანვე აქტიურად იყვნენ ჩართული ამ საქმეში.
„ნიკო გომელაური სრულიად ახალგაზრდა წავიდა ჩვენგან, მაშინ, როდესაც შემოქმედებითი სიმწიფის ასაკში შედიოდა. ასაკის მიუხედავად, მან ღრმა კვალი დატოვა ქართულ კულტურაში, ადამიანთა გულებში, დამსახურებულად მოიპოვა სიყვარული და პატივისცემა როგორც ხელოვანმა, მოქალაქემ და  მეგობარმა. ამდენად, ჩვენს მოვალეობად მიგვაჩნდა ნიკო გომელაურის სახელის უკვდავყოფა დედაქალაქში, იმ ადგილას, სადაც იგი მოღვაწეობდა - თავისუფალ თეატრთან, რომელიც, ალბათ, ყველაზე უკეთ და სრულად გამოხატავდა ამ ადამიანის სულისკვეთებას. თამამად შეიძლება ითქვას, რომ ნიკო გომელაურმა ჩვენს დედაქალაქს კიდევ ერთი შესანიშნავი სკვერი შესძინა, რომელიც თბილისელების საყვარელ  ადგილად იქცევა.“ - განაცხადა დავით ნარმანიამ.
დედაქალაქის მერიის ინიციატივით, ნიკო გომელაურის სკვერის კეთილმოწყობის სამუშაოები  თბილისის განვითარების ფონდმა  2014 წლის ზაფხულში დაიწყო და 2015 წლის აპრილის დასაწყისში დაასრულა. პროექტის ავტორია თბილისის მერიის არქიტექტურის სამსახურის უფროსი ნინო ღოღობერიძე.  მსახიობის მონუმენტი მოქანდაკე როკო ირემაშვილის ავტორობით დაიდგა.
სკვერის კეთილმოწყობის სამუშაოები ორ ეტაპად ჩატარდა. პირველ ეტაპზე, სკვერის ტერიტორია მოპირკეთდა მაღალი ხარისხის ბაზალტის ფილებით,  ირგვლივ ჩატარდა გამწვანებითი სამუშაოები, დაირგო დეკორატიული მცენარეები, კიბეებზე დამაგრდა რკინის მოაჯირები, დაიდგა სკამები, სკვერში ასევე დამონტაჟდა სანათები და  გაკეთდა თეატრის აფიშის დაფა. პროექტის მეორე ეტაპზე ნიკო გომელაურის ლექსები ლითონის ასოებით დაიწერა და  სკვერის საფეხმავლო მონაკვეთზე, სკამებსა  და კედელზე განთავსდა. 

სიახლე
15 აპრილი 2015  
 
 

27 აპრილს 23:00 საათიდან 10 დღით მეტეხის გვირაბის მიმდებარედ არსებული ხიდების  მარჯვენა მიმართულებაც დაიკეტება. ტრანსპორტის გადაადგილება ბარათაშვილის პანდუსის საშუალებით მარცხენა სანაპიროდან მარჯვენა სანაპიროს მიმართულებით იქნება შესაძლებელი.
სარეაბილიტაციო სამუშაოების დაწყების გამო მარცხენა მიმართულება 26 მარტს დაიკეტა. მარჯვენა მიმართულებაც სწორედ მასზე მიმდინარე აღდგენითი სამუშაოების გამო იკეტება. პროექტის მიხედვით, მოეწყობა ჯერ ბეტონის, შემდეგ კი  ასფალტის საფარი.
რაც შეეხება მარჯვენა მიმართულებას, მისი რეაბილიტაცია მაისის პირველ ნახევარში დაიწყება და ივნისის ბოლოს დასრულდება.
აღდგენით სამუშაოებს შპს „კავკასუს როუდ პროჯექტი“ ახორციელებს.

 

სიახლე
27 აპრილი 2015  
 
 

თბილისის გარე-განათების ქსელში კიდევ ერთი პილოტ პროექტი განხორციელდა. „სინათლის ქალაქის“ დახმარებით, ყაზახურმა კომპანია „SD Group”-მა ჯავახიშვილის ქუჩაზე, საცდელი ვადით, 17 LED სანათი დაამონტაჟა. დიოდური სანათების მონტაჟისა და განათების ჩართვის პროცესს „სინათლის ქალაქის“ ხელმძღვანელობა დაესწრო.
„სინათლის ქალაქის დირექტორის, ვასილ ხორავას განცხადებით, ამ ეტაპზე თბილისში 4 პილოტ პროექტი ხორციელდება. მისი თქმით, დიოდური სანათები დამონტაჟებულია ლეხ კაჩინსკის ქუჩაზე, ბარათაშვილის ხიდზე, აეროპორტის შესასვლელთან და ახლა უკვე ჯავახიშვილის ქუჩაზე. როგორც ხორავამ განაცხადა, მიმდინარე პილოტ პროექტებს სპეციალისტები აკვირდებიან, რომლებიც მათი ეფექტურობის შესახებ დასკვნას წარმოადგენენ.
საპილოტე პროექტები „სინათლის ქალაქმა“ პოლონურ კომპანიებთან „ბიო სულოშენ“ და „ევოლუცია პოლანდ“ ერთობლივად განახორციელა, მათ რიცხვს, ამჯერად, ყაზახური „SD Group”-მა დაემატა.
დიოდური სანათები  ელექტროენერგიის 60–70 %-იან ეკონომიას გასწევს.

სიახლე
8 აპრილი 2015  
 
 

თბილისის მერიასა და აფხაზეთის ავტონომიური რესპუბლიკის მთავრობას შორის ურთიერთთანამშრომლობის მემორანდუმი გაფორმდა. ქართულ და აფხაზურ ენებზე მემორანდუმს ხელი თბილისის მერმა დავით ნარმანიამ და აფხაზეთის ავტონომიური რესპუბლიკის თავმჯდომარის მოვალეობის შემსრულებელმა ვახტანგ ყოლბაიამ მოაწერეს.
მემორანდუმის მიზანია დევნილთა პრობლემების მოგვარების საქმეში  თბილისის და აფხაზეთის ა/რ მთავრობის კოორდინირებული მუშაობის ხელშეწყობა.
როგორც ხელმოწერის შემდეგ გამართულ შეხვედრაზე აღინიშნა, თბილისის მერია აფხაზეთის ავტონომიური რესპუბლიკის მთავრობასთან მემორანდუმის გაფორმებამდეც აქტიურად თანამშრომლობდა. „დევნილთა კომპაქტურ ჩასახლებებთან საჯარო ინფრასტრუქტურის მოწესრიგებას დედაქალაქის მერია უზრუნველყოფს, არის სხვა სფეროები, რომლებიც ეტაპობრივად გამოიკვეთება და აქტიურად ვიმუშავებთ, რათა მეტი საერთო პროექტი და პროგრამა განვახორციელოთ“- განაცხადა დავით ნარმანიამ.
აფხაზეთის ა/რ მთავრობის თავმჯდომარის მოვალეობის შემსრულებლის ვახტანგ ყოლბაიას თქმით, მემორანდუმის აფხაზურ ენაზე თარგმნის ინიციატორი დედაქალაქის მერიაა. „ვინაიდან საქართველოს კონსტიტუციით, აფხაზეთში მეორე სახელმწიფო ენა აფხაზურია და ხელშეკრულება აფხაზეთის მთავრობასთან იდება, ჩვენ  სიამოვნებით დავუჭირეთ მხარი მერიას“ - განაცხადა ვახტანგ ყოლბაიამ.
მემორანდუმის თანახმად, მხარეები გამოთქვამენ მზადყოფნას ხელი შეუწყონ ქართულ-აფხაზური ურთიერთობების განვითარებას, კულტურის პოპულარიზებას ერთობლივი პროექტების საშუალებით. მხარეები თანხმდებიან, რომ შესაძლებლობის ფარგლებში ხელს შეუწყობენ თბილისის მერიის მიერ დაგეგმილ სხვადასხვა საგანმანათლებლო, კულტურულ, სპორტულ და ახალგაზრდულ აქტივობებში დევნილი მოსახლეობის მაქსიმალურ ჩართულობას, ერთობლივი ძალისხმევით უზრუნველყოფენ თბილისში განსახლებული დევნილებისათვის ჯანდაცვისა და სოციალური მიმართულებით თბილისის პროგრამების მაქსიმალურ ხელმისაწვდომობას, დევნილთა დასახლებებში გამწვანების აქციების ორგანიზებას და სხვა. მხარეები გამოყოფენ პასუხისმგებელ პირებს თითოეული მიმართულებით, რომლებიც ერთობლივად შეიმუშავებენ და კანონმდებლობით დადგენილი წესით თბილისს და აფხაზეთის მთავრობას წარუდგენენ ურთიერთთანამშრომლობის პროგრამას, განსახორციელებელ პროექტებსა და ინიციატივებს.

 

 

 

 

 

სიახლე
27 აპრილი 2015  
 
 

გლდანის რაიონის 59-ე საჯარო სკოლის ეზოში გამწვანების აქცია გაიმართა. საჯარო სკოლის მოსწავლეებთან და პედაგოგებთან ერთად, გამწვანების აქციაში მონაწილეობა მიიღეს თბილისის მერმა დავით ნარმანიამ, განათლების მინისტრმა თამარ სანიკიძემ, სამინისტროს თანამშრომლებმა, მანდატურებმა, ეკოლოგიისა და გამწვანების საქალაქო სამსახურის უფროსმა ბიძინა გიორგობიანმა.
თბილისის მერის განცხადებით, მნიშვნელოვანია, რომ გამწვანების პროცესში უშუალოდ სკოლის მოსწავლეები არიან ჩართული.

"თბილისის მერიასა და განათლების სამინისტროს შორის გაფორმებიული მემორანდუმის ფარგლებში ჩვენ იმ სკოლების ეზოებში, სადაც გვაქვს თავისუფალი სივრცე, ვრგავთ ხეებს. ეს ღონისძიება მნიშვნელოვანია ქალაქის გამწვანების თვალსაზრისით და ასევე მნიშვნელოვანია, რომ თვითონ მოსწავლეები არიან ჩართული ამ პროცესში და სწავლობენ, როგორ დარგონ ხეები და როგორ მოუარონ მას", - განაცხადა დავით ნარმანიამ.

როგორც განათლების მინისტრმა აღნიშნა, სკოლის მოსწავლეები თავად იზრუნებენ ნერგების მოვლა-პატრონობაზე, რაც მათი შემდგომი განვითარებისთვის მნიშვნელოვანია.

"სკოლები ძალიან აქტიურად ჩაებნენ გამწვანების პროგრამაში. დღეს ჩვენ ვართ 59-ე სკოლაში, რომელსაც საკმაოდ დიდი ტერიტორია აქვს და ერთ-ერთი მსხვილმასშტაბიანი პროექტი სწორედ აქ განხორციელდება, იმიტომ, რომ 1400 ნერგი უნდა დავრგოთ. ბავშვები ძალიან მონდომებულები არიან, ჩართულები არიან ასევე პედაგოგები, გვეხმარებიან მანდატურები. მნიშვნელოვანია, რომ ჩართულები არიან ბავშვები, რაც მათი განვითარებისთვის ძალია ნ კარგია", - განაცხადა თამარ სანიკიძემ.

სკოლის ტერიტორიაზე, პირველ ეტაპზე, 500 კვიპაროსის, 100 იფანისა და 100 ნეკერჩხლის ნერგი დაირგო. პროექტის მეორე ეტაპზე, სკოლის ეზოში დაახლოებით 800 ძირი ხე დაირგვება.

საჯარო სკოლების ეზოების გამწვანების პროექტის ფარგლებში, რომელიც თბილისში მდებარე 60 საჯარო სკოლას მოიცავს, ამ დროისთვის დარგულია 6 100 ფოთლოვანი და 1000 წიწვოვანი ჯიშის ნერგი. პროექტის მიხედვით, ჯამში, საჯარო სკოლების ეზოები 10 000 ფოთლოვანი და წიწვოვანი ჯიშის ხე-მცენარით განაშენიანდება.

როგორც საჯარო სკოლებში, ასევე სხვა ობიექტებზე, მერიის ეკოლოგიისა და გამწვანების საქალაქო სამსახურის მიერ დარგული მცენარეების მოვლა-პატრონობას ამავე სამსახურის კონტრაქტორი კომპანიები უზრუნველყოფენ. ისინი, ვალდებული არიან, ხმობის შემთხვევაში, ნარგავები შესაბამის სეზონზე ახალი ნერგებით ჩაანაცვლონ.

სიახლე
5 აპრილი 2015  
 
 

კახეთის გზატკეცილზე, ლილოს რკინიგზის ხიდიდან ლოჭინის ხევამდე  1 300 მეტრის სიგრძის დახურული სანიაღვრე კოლექტორი მოეწყობა. კოლექტორის მოწყობის სამუშაოები დღეს თბილისის მერმა დავით ნარმანიამ კეთილმოწყობის  საქალაქო სამსახურის უფროს ავთანდილ სუდაძესთან ერთად დაათვალიერა.
დავით ნარმანიას თქმით, კოლექტორის არარსებობოს გამო, გზის ამ მონაკვეთზე წვიმის დროს დიდი დაბრკოლება ექმნებოდა როგორც ფეხით მოსიარულეებს, ისე  მძღოლებს. მისივე თქმით, ახალი კოლექტორის ექსპლუატაციაში შესვლით პრობლემები მთლიანად აღმოიფხვრება.
პროექტის მიხედვით, კეთდება სანიაღვრე ქსელი. გზის ერთ მხარეს  600 მმ, მეორე მხარეს კი 800 მმ დიამეტრის რკინა-ბეტონის მილები განთავსდება, მოეწყობა  ჭები და ცხაურები, დაიგება ასფალტის საფარი. ხევთან ახალი კოლექტორის მარჯვენა და მარცხენა მხარეები  ცენტრალურ სანიაღვრე კოლექტორს შეურთდება.
კოლექტორის მოწყობის სამუშაოები 2014 წლის დეკემბერში დაიწყო და 2015 წლის მაისში დასრულდება.  
სამუშაოებს შპს „პალიტრა“ აწარმოებს.  პროექტისათვის დედაქალაქის ბიუჯეტიდან 892 490 ლარია გამოყოფილი.

                                                                                                                                          

სიახლე
27 აპრილი 2015  
 
 

ინტენსიური სამუშაოები მიმდინარეობდა მთელი ღამის განმავლობაში ცოტნე დადიანის გამზირზე, აეროპორტის გზატკეცილზე, ბელიაშვილის, ჯავახიშვილის, წინამძღვრიშვილისა და ჩიქობავას ქუჩებზე, სადაც მიმდინარე სამუშაოები თბილისის მერმა დავით ნარმანიამ მონიტორინგის ჯგუფთან ერთად დაათვალიერა.

აღნიშნულ ქუჩებზე ორმოული და ფრაგმენტული შეკეთება მიმდინარეობს, ხოლო დადიანის გამზირზე გზა კაპიტალურად იგება. ამ დროისთვის უკვე შეცვლილია მიწისქვეშა კომუნიკაციები, დაწყებულია პირველ სექტორზე გზის საფარის დაგება. დადიანის ქუჩის რეაბილიტაცია მაისის ბოლოს დასრულდება.

თბილისის მერიის გადაწყვეტილებით, დედაქალაქში დღის განმავლობაში არსებული ინტენსიური საავტომობილო მოძრაობის გამო, საგზაო ინფრასტრუქტურის მოწესრიგება უმეტესად ღამით მიმდინარეობს, რათა არ მოხდეს მოძრაობის შეფერხება.

ამ დროისთვის სარეაბილიტაციო სამუშაოები დედაქალაქის ათზე მეტ ქუჩაზე ერთდროულად მიმდინარეობს. სულ მალე დაიწყება რამდენიმე ქუჩის კაპიტალური შეკეთება.

 

 

სიახლე
27 აპრილი 2015  
 
იხილეთ მეტი