სიახლეები

დედაქალაქის მერი კახა კალაძე მერის მოადგილე სოფიო ხუნწარიასთან ერთად, სასტუმრო "სტამბაში" თბილისის ფოტოგრაფიისა და მულტიმედიის მუზეუმის გახსნის ღონისძიებას დაესწრო.

სტუმრებმა "აჭარა ჯგუფის" მიერ მუზეუმისთვის დათმობილი სივრცე დაათვალიერეს. ღონისძიება ფრანგი არტისტების დუეტის, ვენსან მუნისა და პრისცილა ტელმონის ვიდეო ინსტალაციით "Unus Mundus: რიტუალები და ტრანსი" გაიხსნა.

შეკრებილ საზოგადოებას თბილისის მერის მოადგილე სოფიო ხუნწარიამ მიმართა და ახალი მუზეუმის შექმნის მნიშვნელობაზე ისაუბრა.

"მინდა ქალაქს მივულოცო კიდევ ერთი არაჩვეულებრივი სივრცის შექმნა. ჩვენ არაერთხელ გვითქვამს, რომ თბილისი რეგიონში კულტურის დედაქალაქი უნდა გახდეს. მულტიმედიური მუზეუმის გახნა, რომელსაც თავისი მედიათეკაც ექნება, სწორედ ამ მიმართულებაზე მეტყველებს - ეს რეგიონში პირველი ფოტომუზეუმია. რაც შეეხება მედიათეკას, ხაზი მინდა გავუსვა, რომ ქალაქ თბილისის მერია მომავალი წლიდან სწორედ მისი მოწყობის კომპონენტში ჩაერთვება", - განაცხადა სოფო ხუნწარიამ.

მუზეუმის პრეზენტაცია თბილისის ფოტოფესტივალის საიუბილეო, მე-10 გამოშვების გახსნის კვირეულის ფარგლებში შედგა. თბილისის ფოტოგრაფიისა და მულტიმედიის მუზეუმის შექმნა შესაძლებელი გახდა შვეიცარიის განვითარებისა და თანამშრომლობის სააგენტოს (SDC) მიერ დაფინანსებული პროექტით - "სამხრეთ კავკასიური ფოტოგრაფიის ჰაბი განათლებისა და ინოვაციისათვის", ხოლო სივრცე მუზეუმს "აჭარა ჯგუფმა" სასტუმროს "სტამბა" ტერიტორიაზე დაუთმო.